ISIS ji majung saka US tamajungba

Washington, August 2 (Agencies): India tsür Media studies nung Professor, America senso kati, Iraq, Afghanistan aser Pakistan nung US-i nisung timba tepsetba ajanga Islamic State (IS) dang nungi US tamajungba ta sangdongba sülen media aser lokti ajak nung mi senoktsü amai kümogo.
“Hau, ISIS ji majung saka US tamajungba kechiba süra Iraq, Afghanistan aser Pakistan linüktem nung parnoki nisung million 1.3 tashi taküm lalutsüogo,” ta Rutgers University nung associate professor, Deepa Kumar-i March 26 nü twitter ajanga lemsatepogo.
Lai iba osang twitter nung enoktsüli nisung aikati la taküm linüra America nungi oadokang ta ashi aser karibo asaya menür amai bilem. Ajisüaka la den külem inyakertemibo lai bilemba lemsatepba atema kecha lendong aser tetsübutsü mali ta shia liasü.
“Ni Deepa Kumar-i sayurtem atema bilemtsür. Shisatsü meshidak nisung iang ISIS dang US tamajungba ta ashitsü bilemtettsü. Ozü sorkari tetsür tanur meyirjang aika lungbanga putena yur tashiyim agi meraksatsür,” ta Northeastern University nung political science professor aser kiralongraba bushisüngdangba nung mongin, Max Abrahms-i cable network dang ashi.
Kumar-i Education osangkaket ka den interview agiba mapang tangari lai ashiba oji US anema lir ta ashidang, la sasa lai ashiba pusema shia liasü.
Lai ‘Islamophobia & the Politics of Empire’ kaket zülua lir aser lai, iba amai professor arishiba mapa ya tang tasen masü, ta ashi.