Alanis & Mario nem jala ka moatsüogo

July 09, 2016 : Nüngtugu ken  ‘You Oughta Know’ atenla, Alanis Morissette-i kinungbo, Mario ”Souleye” Treadway tena nem jala ka moatsüogo, ta Instagram ajanga lemsatep. Ibai tena asoshi tanur tanabuba lir aser la taoba ita aso aser tenünga Onyx Solance jatsüogo.
Alanis-i, “La alimai aruogo! Onyx Solace Morissette-Treadway,” ta June 23, 2016, la asonü instagram nung ashi.
Tena mezüngbuba tanurji jabaso arishi küm pongu tain, Ever Imre lir.
Alanis azünga aliba mapang kaket ka zülur. Iba kaket ya lai ajangshba aruba tepela , tejashi, aser tajangzük dak ajemdaker zülurba lir.
Lai, “Kü sasa ni ano junga mangatet amai ni bilema liasü, ajisüaka tangbo ajak angajema aser rateta angateta aruogo,” ta ashi.
Alanis-i, ni tetsü ka aküm tashi nung kü nüngdaktema melenshiogo, ta ashi.
La entertainment industry nung mezüng ajemokba mapang ajangshiba lemsatepdang Alanis-i, “Ajak shia meteta aliba nisungtem dang kanga pelar aser parnok nem akhümtsübu agütsür. Mezüngbo iba industry nung ni ya aiener ka ama kü sasa bilema liasü. Ni ajak den kasa alitsü kanga merang. Ni celebrity aika dang phone ajanga tembar akümtsüsa asüngdanga liasü aser iba mapang aiben parnoki, kechiba call asür ta asüngdanga liasü. Iba mapang ni tembar akümtsü atema phone nungsa masüngdanger asütsü südi ta  bilema liasü,” ta ashi.