Euro 2016: Portugal o France na taonung final asayatsü

Paris, July 09 (Agencies): Real Madrid telok striker, Cristiano Ronaldo densemba Portugal telok aser tan asayamong nung goal 6 tashi agütsüsang, Antoine Griezmann densemba France telok nati asüng, Deobar aonung Euro 2016 football asayamong final Paris yimtiba anüdoklen, Stade de France stadium nung asayatsü terenemshiba agia lir.
Kasa asayadak France aser Germany telok na tsüngda friendly asaya ka yaküm, 2015 küm November ita asayadang peisasa pokseta asütsü mulungteter kiralongrartemi bomb lendong atalokdaktsüba sülen nisung 130 shi poksetdakja liasü.
Yaküm lendong atalokba indang bilemteta temulung shirang aka, France teloki Portugal telok madak takok ngua, pei asayadak tongti takok marok 3 buba agizüktsü alizüng yua lir.
France teloki 1984 European Champion aser 1998 World Cup takok marok agizükba densema, tanü tashi nung tongti football asayamong takok marok 2 tashi pei asayadak agizüka lir.
France teloki Albania telok den asayaba Euro 2016 tetenzükba asaya nung goal agütsüba densema, arishi küm 25 tain Griezmann-i tan asayamong nung goal 6 tashi agüja, tan asayamong nung Golden Boot aser UEFA Player of the Tournament sempet agizüktsüsa jenjang tajung ngua lir.
Ronaldo-ia tan asayamong nung bilemba ama shilem magiteti aruba sülen goal 2-0 agi Wales madak takok ngua asayaba semifinal akoktsüsa par Portugal asoshi kanga junga asayaogo.
Ano, Ronaldo densema, par Portugal-i 1975 küm nungi tenzüka tanü tashi nung France telok den 10 ben tashi ajurutepdang ken danga takok monguteti lir.
Ajisüaka, Wales telok den asayadang tetsüng yirusang, centre-back asayar, Pepe tajungba küma final asaya nung shilem agitsüsa terenemshiba agitsü tenzüka lir aser pai shilem agiba ajanga par Portugal teloki final asayaji akoktsü ta Portugal coach, Fernando Santos aser pai aniba Portugal teloki mangdang tulu ayuba osang angazükogo.
Ano külen, “Tanü tashi nung Ronaldo akoktsüsa shingaia tasa tajung nguteta mali,” ta France coach, Didier Deschamps-ia metetdaktsüogo.