Northeast nung hospital yipden lakh 8 talila nüngdaker

Guwahati, July 10 (Agencies) : Guwahati nung FICCI aser PHFI nati North East Health Care Summit ayongzüka amungdang north east nung health care dak sendakba maparen nung terenlok aser major public & private sector investments nüngdaker ta tebilembatem lemsatep.
Iba sentong ya Health & FW Minister, Mizoram Lal Thanzara-i lapoktsü aser Chairman, FICCI NE Advisory Council, Ranjit Barthakur, President Public Health Foundation of India (through VC) Dr. K Srinath Reddy, vice president PHFI Jayanto Narayan Choudhury nunger den Mizoram, Meghalaya, Sikkim nungi state health minister tem aser north eastern state nungi MP tem aden.
Northeast nung healthcare dak sendakba maparenji kanga tongtipang aser iba asoshi FICCI o PHFI nati sentong tajung ayongzükba atema kanga pelar, ta Thanzara-i tongti tesemdanger o jembidang ashi.
Senotsü timtem, health atema skilled manpower peria maliba, alinük majungba aser medical college tajungtem maliba ajanga northeast nung healthcare jenjang mejungi lir, ta paisa shisem.
FICCI NE Advisory Council chairman, Ranjit Barthakur-i o jembidang, India rongsenkettsüng ajungkettsü atema northeastern region dak tashi lir saka ibaji northeast nung alirtemi tashidak khuret melii pei akokba tashi inyakba ajanga dang tongtettsü, ta ashi.
“Alima nung nütsüng yongsük 1000 shia yipden 2.9 shi atar, anungji global average den medemdangra, nütsüng 45.45 million aliba northeast tesem nung hospital yipden lakh 8 shi nüngdaker” ta Ranjit Barthakur-isa metetdaktsü.
“India nung Northeast ji tesem tajung rongnung ka lir saka aiben iba tesem nung temang anema alibaren tsütsü linük nung tangartem memeneper. Centre sorkari nangzükba ama north-east region nung health jenjang ajungkettsü aser ibaji technological & infrastructure advancements ajanga inyaktsü” ta Public Health Foundation of India President, Dr. K Srinath Reddy-i video conference ajanga jembidang ashi.
Iba senden nung north eastern state tem nungi doctor tem, national & regional speakers, hospitals, pharmaceutical companies, medical devices companies nungi nübotem aser tangartem aika aden.