Hopta bazaar

Ao Kaketshir Mungdang (AKM) aser Mokokchung Chamber of Commerce & Industries (MCCI) telok nati Mokokchung nung tzümalen nungi hopta bazaar amentsü purtem mashimashi atudaktsüba indang tebilemtsütem district administration dang ashibaji Mokokchung town nung alirtem asoshi dang masü saka Mokokchung district nung alirtem ajak asoshi teinyaktsü rongdak nüngdak ka asütsü. Asenok tzümalen süidang lenmang lendi anasa anogo shia saka tesem balala nung bazaar mena ajuruba ya hopta bazaar amenertem lir. Hopta bazaar tetezü hopta nung ken shishilembartem tesem ka nung adenshia aonsutsü, jangotsü aser süoshi nungi shir nisungtem nüngdakba osettsüset tapu balala bener arua ayoker. Item chiyongtsü aser osettemji iba tesem nung talubosa manguba mesüra jenjang dalang agi mangubatem tangalen nungi bener arua ayoker asünungji iba tesem aser temeket nung alir nübortem adenshia raktepa alir. Aji oda, tangalen nungi pei alidak talubosa mesüra jenjang dalang agi mangubatem arua ayoker asünungji aikati hopta piyong achitsü aser agitsü alidena ayur. Iba jagi senotsü aser mapang kümzüker. Ajisüaka, asen lima nung talisa Tuli, Changtongya aser Mokokchung nung tzümartem hopta nung kenü atua bazaar amenba maparen nung yabo asenokang akoksatsüsa mapa aika sendaka lir. Ibayongji, tamalena ken anabenkabo iba yimobilem nung asen lima nung hopta bazaar ya asen nisungi amenang tajungba mesüra mamenang tajungba ta shidangogo. Asenoki hopta nung ken tzümartem atua asen alidak bazaar mendaktsüba jagi asen akaba sen ajak parnok nem bener yoker. Ibaji dang masü saka ano parnoki ayokba ajak asenoki aginür aser chinür, anungji menüngdakbatem aliba nung dang senotsü teimba endoker alir. Ano, tzümartem dang nisung ajaki hopta piyong achitsü alidena ayur asünungji, anogo shia aonsutsü aser jangotsü ayoker asen liso nisungtem kanga akoksar. Ibaji dang masü saka tzümartemi bener atuba chiyongtsü teimbaka yashi tesem ka nung amendang meyokmaba chiyongtsütem asür. Ano, chiyongtsü karbo jenjang dalang süaka temang atemabo chiyongtsü tajung masübatem asütsüa akok. Ajisüaka, asen lima nungbo nübortem dang mayokdang shi ango süli mesüra tanga chiyongtsü süli tetendanger mali, anungji tenük agi repranger majungyonga jenjang dalang süra alia achir. Aji oda, shitakba agibo item chiyongtsütem ajakji nübortem dang ayok metenzükdang tedendangtsü pur (Food Inspector)-i tendanger dang ayoktsüla. Iba nüngdakji AKM aser MCCI purtemi Mokokchung DC dang nenshia metetdaktsüogo. Ashiko, nübortem asoshi ‘Food Inspector’ ta asübaji tangashia mangashidang asütsüa akok ! Ano, tebilemtsü kaji Nagaland telongi tzümar shinga temelaba (ILP) mebeni aittsü makok. Ajisüaka, yakanü Honibar anepdang Amguri leni hopta bazaar amentsü asoshi atuba tzümar terka Mokokchung police-temi apubaji shitak saka tesüngmangtsü kaji, kodaser tzümar paikaji gari pongo nung Nagaland gate ajanga ILP melii atutet ta AKM aser MCCI nungertemi asüngdangbaji District administration aser Police ketdangsertemi dang masü saka nübortemi dena bilemdanga ozüng shitak amshitsüsa shilem agitsü nüngdak tulu adokogo. Shitakba agi, ILP mebeni hopta bazaar kenü mener meyipa alutsü atema atur tzümartem dang nungibo ILP bener kümsa küm asen lima nung dokan amener tzümartem ya aibelen tuluba lir. ILP ozüng agi yamaji Nagaland nung dokan kibur küma alitsü memelar. Itemjia ozüng raksartem lir, ajisüaka asenoki asenok ajangzüktsü atema ozüng lateta akabaji memetet. Iba jagi tangar junglanger aser asenok akoksar. Joko, asenok ajaki azüng zülubo meteta lir, anungji item nüngdakba ozüngtemjia meteta alitsü nüngdaker. Aji oda, AKM aser MCCI purtemi ILP (BEFR 1873) ozüng indang nübortem nem tangatetba agüja mapa küma inyaktsü asoshi shisatokden sentong ayongzüka aka nunga kanga tajangzük asütsü. Aji oda, koba agi asen hopta ka atema tera ajangzüker saka nübortembo teti atema takoksa angur, item mapatemjibo ozüng nung ajemdaker nokdangtsüla.