J&K atema PM Modi-i senden ka jatepa amen

New Delhi nung Prime Minister, Narendra Modi-i Jammu & Kashmir atema kanga dang temaba jenjang nung senden ka jatepa amendang agiba noksa angur.

New Delhi, July 12 (Agencies) : Mongulbarnü Prime Minister Narendra Modi-i kanga dang temaba jenjang nung senden ka jatepa Jammu & Kashmir tensa indang onük benoka lemsatepogo.

Africa linük 4 tashi semdangba sülen PM Modi Mongulbarnep linüki meyipa aru.

7, Race Course Road nung senden amenba sülen Minister of State in Prime Minister’s Office Jitendra Singh-i osangbener dang ashiba agi, Prime Minister-i Jammu & Kashmir nung Burhan Muzaffar Wani tepsetba sülen tatalokbatem ajak indang osangtem metetpeladar.

Hizbul Mujahideen kiralongrar Burhan Wani tepsetba sülen sepaitem aser lungkak aitertem tsüngda raratep adokyonga arur.

Iba senden nung Home minister Rajnath Singh, finance minister Arun Jaitley, foreign minister Sushma Swaraj, defence minister Manohar Parrikar, NSA Ajit Doval, foreign secretary S Jaishankar aser tanga tongti ketdangsertem aden.

July 17 nungi Rajnath Singh-i United States semdangtsü sentong liasü saka J&K nung mepetmesü ajanga pai ibaji thienogo.

Rajnath-i J&K indang tensa ketdangsüa repranger aser ano Parliament nung Burhan Wani tepsetba indang tasüngdangbatem pai ang langzütsü, ta ketdangser kati ashi.

July 18 nungi Parliament monsoon session tenzüktsü aser iba mapang home minister-i Parliament dang J&K indang osang metetdaktsütsü.

Mongulbarnü züngsema anogo pezübuba tesem aika nung curfew ozüng liogo aser tang tashi nung tasür ajak agi nisung 24 jungogo.

Hombarnü lungkak aitdang yirur ka lanur ka mozükidang asü. Bijbehara nung injang kahdokdang Adil Ahmad Mattoo yiru aser pa SMHS Hospital nung yasüng tesü asü, ta police ketdangser kati tanü metetdaktsü.

Hizbul Mujahideen commander Wani tepsetba sülen lungkak aitba sentong balala ayongzüka agidang sepai 115 dena nisung 350 den tema yirua lir.

Tanü agi anogo pezübuba mobile internet aser train services shibang aser south Kashmir kübok district pezü nung mobile telephony tera lapok.

Ano külen, telungpur teloktemi lungkak aittsü ayongzükba ajanga tesem aika shibang.

Dokan, nija office tem, shishilembadak aser petrol pump ajak shibang aser sorkar office o bank tem nung inyakertem aika mapai maru, ta ketdangsertemi ashi.

Anogo pezübuba atema public transport maliasü aser nija garitem den auto-rickshaw tem tesem kar nung dang senzü, ta parnokisa shisem.

J&K nung shisaliok rejutem tang mei sodi lir aser Central University of Kashmir (CUK), Kashmir University, Islamic University of Science and Technology (IUST) o Jammu and Kashmir Board of School Education (JKBOSE) nungertemi tensa majunga ajanga tatidangtem thineogo.