Moijing külemertem

Tanü asüng asen lima nung, talisa, lanurtem rongnung moijing külemertem adokba indang kanga bolua jembir. Aji oda, yimdong o dang masü saka tenla kidang dena nisungtemi anguba aser ajuruba indang kuli asüba angashiogo. Anungji, mamangtsüla masü, shitakba atalokdagi. Ibai tsüraburtem aser ano talisa arogo nung lenirtem asoshi nükenbelema inyaktsüba wadang tasen tuluka asütsü. Kechiba moijing külemertemji lanurtem dang? Tsüraburtemibo mojing mekülemner asü (?) mesüra mojingi tsüraburtembo mebushir? Asenoki item  tasüngdangbatem sarasadema langzütsü merangdangra, idangji Tsüngremi asenok dang item shisabolu wadang akoktsü asoshi lenmang sayutsü. Atangji, asenok yabo nisung ajak tasodang nungi Khristan kümer asoba purtem lir, anungji tasodangyongi Yisu Khristaji pei taküm nung kibur sür asor. Ajisüaka, tsüraburtem den lia-lia Yisu masü mojing külemtsüsa akümba tanurtem tiaji jungjunga reprangdangra, tsüraburtemi tanur ka taküm nung pei aotsüba lenmang shitak mesayutetba aser arogoi tila tanur aser lanurtem taküm kümzüktsü bushia maoba ajanga atalokbatem asütsü. Lanurtemi moijing külemnüba kuliji tangar dang nungi tashi balaka (supernatural power) aginür, kechiyong parnok taküm aser kibongji, teimbaka, tepetzük tia nung lir. Item lanurtem jagi moijingibo parnok nem parnoki aginüba nüngdak ajak agütsütsü ta amanger aser yamaji mojingia parnok mesüzüker. Ashiko, moijing külemer lanurtemi nüngdakbaji kar asoshibo mobile phone set tajung ka aginür asütsüa akok, karbo süoshi tajung aginür asütsüa akok, karbo lesson junga mebushiyonga takok nguner asütsüa akok, ano karbo mapa aginür asütsüa akok aser karbo sen aginür asütsüa akok. Iba amaji pei taginüba balala alitsü. Item dangji parnoki dang Yisu Khrista dak jungjunga amangra, parnok nüngdak ajakji ataloktsütsü ta tsüraburtemi aser arogoia mangatetdaktsü asütsüa akok. Moijing külembaji tai dang masü saka ayatai ! Ajisüaka, lanurtem iba ama ayatai tiai idaktsübaji parnok tai masü asenok tsürabur aser arogo nung lenirtem tai asütsü. Aiben tsüraburtemi tanurtemji parnoksasa tajung akümtsü amai bilemer, anungji odang toktsür. Tanurtem nüngdak aika lir aser item nüngdak ajakjibo tsürabur aikati metongtsütettsü aser tanurtemi aginüba ajak agütsütsüjia nüngdak madoker. Anungji tsüraburtemi tanurtem nüngdak aser taginüba indang asüngdanga parnok den shisalemsateptsübaji kanga tongtibang lir. Aji oda, tanurtem dang sensaker agi takar akümba aser tilar agi tulur akümba tatishitsü tajung aketba otsü den Tsüngrem o ashitsübaji kanga tongtibang lir. Itemji tanur ka asoshi pa aotsüba lenmang atema ajok aser tesangwa asütsü.  Iba amaji asenok arogo lenirtemia asenok mapaji tenla kidang arurtem dang Tsüngrem o ashitsübaji dang ta mebilemtsüla. Shitakba agibo, sentepi arurtem asoshibo arogo tebilemtsü kangabo mali saka sentepi marurtem asoshi dang tebilemtsü tulu lir. Aji oda, sentepi arur lanurtem masü saka sentepi marur lanurtemang teimba mojing külemertem akümer. Iba tensa tiaji angateta arogo nung khuret agi ataa alirtemi sentepi marurtem bushia Tsüngrem o agi mesütsübajisa tongtibangba asütsü. Iba atemajibo arogoi senotsüa balaka lemzüktsütsüla. Moijing külemertemji asenoki tsübuba agi tonga mao odang toktsütsübaji masü. Parnok kidang jagi asenok tanüla nokonü bener sarasademi aotsüla. Item ama kidangji Tsüngrem ken atentsüla aser Tsüngrem o maneni jembitsüla. Aji oda, lanurtem asenok tenla kidangi jangrabangraa arutsüsa sentep sentong agitsüla. Tanü lanurtemi tsüngsanga kentener saka asenok tsüraburtemi aji magizüktetter. Lanurtemi tanüla nung ayimtena talanglang sarasademner saka asenok arogo lenirtemi anir tanemi tongmelang ka agi tatsütsü tatemtsü ariteper amai sarasademer yutsür.  Iba jagi lanurtem jangramatemba tuluka lir. Ibaji, talisa, arogo nung lanur lenirtemia metettsüla aser tali bendanga agüja inyaktsü tensa agi akanger. Joko, parnokji aija masü saka parnok taküm nung kibur kümer aliba mojingji asenoki Yisu Khrista tenüng nung aridoktettsüla. Iba tangatetba aser tanüla ain tashiji (Spiritual power) asenok tsürabur aser arogo lenirtem dak alitsüla. Iba amaji ka arrsangokja meinyakra, asüngbo Yisu külemer dangbo mojing külemer teimba kümer alitsü !