SC-i linük Temzüng kümzüka ayuba atema nüma atanger: Sonia

New Delhi, July 14 (Agencies): Modi’er sorkar aija tanü Congress Tir, Sonia Gandhi-i, Modi’er sorkari tashi merumerua arishidang nüburtemi shimtetba sorkar akhüm metsübur, ta ashi.

Yashi Supreme Court-i Arunachal Pradesh nung Congress sorkar shia arutsü atema obendang agütsüba sülen tanü Sonia-i, Modi’er sorkari nüburtemi shimtetba state sorkartem mezüngmeshir, ta ashi.

SC obendangji ajanga Arunachal Pradesh Angh-i taoba Congress sorkar laotsüsa tetuyuba ajak agientsür.

Yaküm Arunachal nung Angh-i tatar senden ita ka agi jelia agitsü asoshi ayongzükba telemtetba ajak Justice JS Kehari ani aniba bench nung  obendanger pongui agientsüogo.

Yangi Congress-i ayongzükba sentong ka nung jembidang Sonia-i, “Tan aliba sorkari tashi merumerua arishidang Arunachal Pradesh aser Uttarakhand nung nüburtemi shima aliba sorkar atsüngtok,” ta ashi.

Congress lenir aser taoba mapang Union minister, Shankarrao Chavan indang kürakyanglu ka aser pa nüngtem nung memorial library ka lapoktsüba sülen Sonia-i, “Supreme Court-i asen linük Temzüng aser democracy kümzüka ayuba atema onoki kanga nüma atanger,” ta ashi.

Iba sentong nung taoba Ato kilonser, Manmohan Singh-a densema liasü.

“Tanü Shankarrao taküm ali asübo item tatalokba ajunga ngur pa melung yirula aser Temzüng dak mapetba inyakba ya ashishila,” ta Gandhi-i ashi.

Congress tongtiisa, taoba mapang UPA sorkari aluyimertem aser sensakertem atema tenzüktsüba welfare scheme balala NDA sorkari tashi meiti kümdaktsür, ta aitsü.

“Manmohan Singh’er sorkari sensakertem, tribals, minority tem aser tetsürtem atema tenzüktsüba welfare schemes tashi meiti akumba ya tejashitsüka lir. Iba yongji kibong lakh aika timtemteper,” ta lai ashi.

“Tesüiba küm 60 nung sensakertem ajangzüktsü atema benokba welfare schemes BJP sorkari tashi meiti kümdaktsür,” ta laisa ashi.

Shankrarrao-i Rajiv Gandhi dena külemi atongsema inyak ta shia Sonia-i, “Pai (Chavan) sensakertem aser adivasis (tribals) meima inyak,” ta ashi.

“Chavan indang memorial ajanga lanurtem aika ajungmesotsü ta ni tamang akar,” ta laisa shisem.