ACAUT-i Dimapur aser Kohima nung gari totzü ayokdak longkak ait

Dimapur, July 14 (TYO): Dimapur nung gari totzü nung kerosene meyoktepba maparen June 27 nü putetba sülen tanü Brehostibar nü ACAUT teloki Dimapur, Kohima aser Phek nung gari totzü ayokdak aser Dimapur nung Food & Civil Supplies (F&CS) Directorate nung longkak aitba sentong ka agiogo.
ACAUT-i ashiba agi, parnoki totzü ayokdak tesem kar anema inyakba ya nisung kar mejetteta arishir masü saka gari totzü o kerosene na meyoktepa ayoker tetsütitem mapa anema nokdakba tamaitsü lir.
Tanü Dimapur nung gari totzü ayokba tesem pezü nung ACAUT purtemi tejashiba o tapu balala zülur longkak aita liasü. Item otem rongnungji, ‘ Onoki Tsüngrem tsübuba business inyakertem aginür’; ‘CM aser state government-i sensakertem dang nungi rakzükratem masütsüla’ ; ‘S K Kerosene oil tetezü Subsidized Kerosene Oil saka Siphon Kerosene Oil masü,’ ta kaket aser sü nung zülur yuja liasü.
Ano, item züluba dak alaka Dimapur nung gari totzü nung kerosene meyokteper ayoker tetsüdi nisung pezü indang noksa aser tenüng zülur tesem tesem nung banner mesanga yuja liasü.
Food & Civil Supply directorate office kima ACAUT purtem den ano parnok pu sema nokdakertem aika adenshia gari totzü nung kerosene enoker ayokba mapatem ya ochishia bushisüngdangtsüla aser tim obendang agütsütsüla, ta metetdaktsü.
ACUAT-isa F&CS department dang parnoki iba ama ochimashi maparen atalokdang bushisüngdang mesütetba indang mepelaba metetdaktsü. FCS purtemi bushisüngdangyonga aji tejak meyiba mapa ka dang asütsü, parnoki ochishia meinyaktettsü ta tamang makaba ken o ka ACAUT purtemi metetdaktsü.
ACUAT-isa State Vigilance-i iba ken o ya agizüka bushisüngdangtsü imlar aser Dimapur police-temia iba maparen nung shitak inyaktsü tamang akar ta metetdaktsü.
Iba maparen nung state government-i tim mapa meinyaktetra, ano tesashiba longkak aittsü renema lir ta ACAUT telokisa ashi.
Kohima nunga ACAUT Nagaland teloki gari totzü nung kerosene meyokteper ayokba mapatem anema longkak aita mongogo. Iba sentong nung lanurtem aikati shilem agi aser parnoki nübortem dang iba ama ashikülak aser ochimashi mapatem anema longjemer nokdaktsüla ta ayongzük.