Hardik Patel jail nungi aluogo, maneni longkak aittsü

Surat, July 15, 2016: Hokolbarnü Surat nung aliba Lajpor Jail nungi Patel kin longkak aiter lenir, Hardik Patel chiokba mapang par nüburtemi pa agizükba noksa nung angur.

New Delhi, July 15 (Agencies): Patel kin reservation atema longkak aitba lenir, Hardik Patel ita 9 tashi Lajpore jail nung amungba sülen tanü tepoukdak nungi aluogo.
Gujarat High Court-i pa nem bail agütsüba sülen pa tepoukdak nungi chiok, ajisüaka pai maneni longkak aittsü ta nangzükogo.
Osangbenertem den jembidang Hardik-i, pai teko tematsük inch 56 menüngdaker, saka par nüburtem atema temeten dang aginer, ta ashi.
2014 General election nüboyimba mapang Ato kilonser, Narendra Modi-i ‘teko tasazük inch 56’ indang jembiba dak sentakba nung Hardik-i, “Ni tar, temang touzük mesüra teko tematsük inch 56 menüngdaker. Ni aginüba ajak agi, ozü nüburtem atema temeten aginer,” ta ashi.
“Taruba anogotem nung onoki maneni longkak aittsü. Patel kin atema onoki OBC jenjang maneni akhanger. Taruba anogotem nung onok inyakyim nung temelenshi alitsü, saka onok tangatetbabo kasa asütsü,” ta Hardik-i ashi.
Taoba hopta High Court-i arishi küm 22 Hardik chioktsü atema lenmang lapokja liasü.
Hokolbarnü high court-i sorkar anema nokdakba ken o ana nung Hardik nem bail agüja liasü, ajisüaka taruba ita trok tashi pa Gujarat state adener oa alitsü tezüngzüktep nung ang pa nem iba bail agütsü.
Pa Hokolbarnü jail nungi mechiok, kechiyong pa anema benokba Visnagar ken o nung bail  Hombarnü ang angadangtsü lateta liasü.
Deobarnü Justice P P Bhatt-i Hardik nem bail agütsü, kechiyong state sorkari pa temepishiba shidiji mashishii liasü. Ajisüaka court-i pa ita asem tashi Mehsana district-i maotsü atema tuyuogo.
Arishi küm 22 Patel quota lenir, Patel anema Ahmedabad aser Surat nung ken o ana benokba sülen yaküm October ita nungi pa jail nung liasü, aser tanü pa chiokogo.
Item ken o nung Hardik-i high court dang bail atema mepishi, kechiyong Surat aser  Ahmedabad nung lower court-i pa nem bail magütsüi liasü.
Hardik-isa yimtenren party balala ajak dang, Patel kin longkak aitba nungi yimtenren tajangzük mebushitsüla, ta ashi.
“Iba longkak aitba ya yimtenren kar indang oset ka masü. Party shingaia iba nungi yimtenren tajangzük mebushitsüla. Ni mesüra kar taginüba nung ajemdaker iba longkak aitba ya manentsü. Patel kini temeten anguba sülen ang iba ya anentsü,” ta paisa ashi.
Hardik-i ashiba agi, state sorkar den o lemteptsü atema lenmang sadema dang lapoka lir.
“Taruba ita trok nung onoki iba onük atema sorkar den jembitsü. Onok takhangbaji kasa dang, aser iba takhangbaji- OBC quota lir. Kodang mapang tongdir, longkak aitba mapang onoki takoksa anguba aser ajangzükbatem asadangtsü aser iba nungji ajemdaker inyaktsü,” ta pai ashi.
“Taruba anogotem nung onoki ozü kin atema telemtetba tajung agitsü. Telemtetba tajung ka dangi arutsü atema onoki sorkar den mener jembitsü melunga lir,” ta paisa ashi.
Hardik lenisüba nung Patel kin OBC nung züngoktsü atema takhangba agüja liasü aser yaküm October ita nung pa apu.
Patel kini OBC atema takhangba agütsüdang sorkar nem agizükdaktsütsü atema pai rara adokdaktsü ta pa nem tai tonglokja lir.
Yaküm August 25 nü Ahmedabad nung Hardik-i lokti senden tulu ka nung jembia liasü aser iba mapang nung rara tulu adoka police ka densema nisung 10 asüba den külemi Gujarat tesem ajaklen gari aser lokti kiojen jenti raksaa liasü.