Mongsenyimti & Molungkimong nung Tsüngremmong takok ngua mongogo

Noksa abelenlen Mongsenyimti nung Tsüngremmong Jilushi Zünga 7 purtemi aidang akhidang tsükimen nung tsükibutsürlar kidang pur züngatsür aser züngapur nüknarar ken denloktsütepa kazütepba sayur. Achijilen Molungkimong nung Tsüngremmong benjung nung tetushi tejaoker pelaa agizükdang agiba noksa angur.

Mokokchung, August 02 : Mongsenyimti nung Riongsanger Putu mendeni ayongzüka August 1, 2015 anogo Yim Watidak Ajajima tesem nung Tongti tesemdanger Er. Lima-Aküm Ozüküm, Superintendent Engineer (PWD) Mokokchung Nagaland aser sentong shibangtsür Wb. Y.O. Bendang Ozüküm, Forest Ranger Mangkolemba jaoka Tsüngremmong benjung kanga longsoa mera keta mongogo.
Tsüngremmong benjung ya aseni aginüba shimteta anogo melenshia amongba ka masü saka mapang tatakzük shitak nung amongba benjung ka lir. Akhidang asen tsüraburtemi iba anogo kanga meshiteta metsünga reta anemponga among aser aibelena anempongra atakatem aru ta tongti tesemdanger-i jembidang ashi.
Paisa, tanü alima mezüteper aoba lima ka nung alidang peisasa angateta benteta mora pangkateper dang anentsü anungji koba tangatetba ka nung Tsüngremmong ya asenoki amonger aser kechi atema ibaji kanga junga angateta amongtsü tim ta ashi.
Mezüngbuba sentong T. Yanger Ozüküm-i ania agiba den N.Chizung Ozüküm, Aola Riongsanger Putu Menden, J. Mar Jamir Tatar nungertemia shilem tatsütsü agia liasü.
Tanabuba sentong Sobaliba saya agiba mapang sentong shibangtsüri jembidang, tanü technology putu ka nung alidang lanurtemi sobaliba angazüktsü nung temulung agütsüdar asü mesüra amang-sangwa metetimi social media amshia tsürabur dena junga majurutepi alir kanga junga shisadangtsüla ta ashi.
Tang aliba lima nung ya asenoki Tsüngrem dangia anasa motet aser Sobaliba-a shitak mamshiteti, chia masü yi-a masü densa ka nung alir anungji asenoki pei ayakji tajung nung tangar-ia hau ta jangjatsüsa alitsü tim ta paisa ashi.
Village Council Chairman Wb. Imna Ozüküm-i lokti ayongzüka jembi aser Naklu Woman Cultural Club, Ar atsütepba – Süngpu Zünga Tebur & Tetsür aser Tsüngremmong Jilushi Zünga 7 purtemi sayua kanga mera keta takok ngua agia liasü.
Aor sobaliba benjung – Tsüngremmong – Molungkimong Mejensanger Putu-i ayonga August 1, 2015 anogo Molungkimong yimtak Tsüngremmong meraketa mongogo.
Sentong nung tetushi tejaoker L. Yanger, President, Confederation of Naga Farmers Union (CoNFU), Mokokchung ajanga Tsüngremmong ratet tejangja ashiba den tsüraburtemi iba benjungmong meshiteta anemponga amongba ama tanü lanu asensortemia anemponga aser ashibanga, merükmejua amungtsü ajungshiba den Tsüngremmong benjung ya limapur benjung ka mekümdaktsütsüsa arogotemi shilem tajung agitsü ayongzük.
Paisa iba benjung ya asen nem temoatsü balala den alu nung metsüjangnutsü jenti moatsüba aser lanu asensortem atema temoatsü meshija Tsüngrem nem tenüngsang agütsüba benjungmong ka asütsü ayongzük.
Tsüngremmong sentong nung tongti tesemdanger Lt. Gen. Bipin Rawat, AVSM, YSM, SM, VSM GoC, Dimapur, Rangapahar liasü saka ajungben duty kar adoka pa sentong nung medentettsüsa küma temelener Major Angad, Camp Commander, Tuli, 31 AR ajanga shilem agija pai shiokba osang agütsü.