Senden Cultural Society, Aoyimkum-i shisatokden sentong ayongzük

Dimapur, July 15 (TYO) : Lanu putu dang sobaliba aser yimyatsüya tim sayutsü nükjidong nung Senden Cultural Society, Aoyimkum-i ‘Sobaliba aser Lanur’ omen nung anogo ka shisatokden sentong ayongzüka agi.
Iba sentongji Panchayat Hall, Aoyimkum nung agi aser tongti o jembirji Guru Sangyusang Pongen liasü.
Alemli mapangbo lanurtem dang teka mapa aser kidang inyakba mapatem indang tesayuba balala agütsü saka tanü putu nungbo iba inyakyimji mali, ta Guru Sangyusang Pongen-i ashi.
Tanü asen putu nung iba inyakyim meliaka, asen oboula nunger mapang sobaliba tajungtemji school tem, loktitentet aser tantsü-tambutemi sayutsü akok. Asen sobaliba tajung ya lanu putu dang sayutsü atema nisung ajaki süoki ia bilemtsüla, ta paisa shisem.
Sentong tetenzük nung Senden Cultural Society president, Guru L Nukshi Ozukum-i ti o jembi,  Senden Cultural Society Advisor, Lano Imchen, aser Aoyimkum Village Council nungi züngsemtemi o jembi.
Sentong nungsa Senden Cultural Society, Aoyimkum-i sobaliba ken ka aten aser sentong nung nisung 200 den tema aden.