China-i Combodia sorkar nem teyari sen million 600 agütsür

Phnom Penh, July 15 (Agencies): China linüki Cambodia sorkar nem teyari sen dollar sen million 600 shi agütsütsü nangzükba olen ka Cambodia Ato Kilonser, Hun Sen-i tanü, Hokolbar nü metetdaktsüogo.
Cambodia linük nung election tetsükdakba kecha majurui agitsüsa nungdakba ki o jen renemtsü, kaketshisatsü agütsütsü lenmang lapoktsütsü aser nübur taküm tia tajungba kümdaktsütsü mapatong balala nung yariteptsü nükjidong nung China-i Cambodia sorkar nem tan teyari senji agütsütsü nangzüker lir.
“Ozü sorkari mepishiba ama, China linüki ozü Cambodia nem teyari sen million 600 shi agütsütsü nangzükogo. Tang Mongolia nung temendak Asia-Europe senden tezülen China Ato Kilonser, Li Keqiang den ajurutepba sülen par linüki nungdakba teyari senji agütsütsü nangzükogo,” ta Sen-i osang jangjashitsü.
China ya Cambodia nungitba linük lir aser tesüiba küm 10 tsüngda nung par linüki teyari sen million jenti agüja Cambodia linük yariba osang bushitetogo.
China-i yariba melena, Cambodia linükia alima jenjang nung ayongba senden balala nung China pusema osang bushiteta lir.