UP nung yi tamajung jemsemer nisung pongu asü

Lucknow, July 16 (Agencies) : Uttar Pradesh kübok Etah district nung yi tamajung ajemba sülen tajemba agi nisung pongu asü aser ter dak tema kanga mejungi kangshidar, ta Honibarnü police-i ashi.
Hokolbar aonung iba yi jemsemertem nisung aika tenük agi mongui kümogo, ta police-isa ashi.
Iba tatalokba angashia kanga jashiba agi Chief Minister Akhilesh Yadav-i SDM, district excise officer, circle officer aser iba tesem nung station house officer nunger mapa nungi anentsüogo.
Iba lendong ya Aliganj kübok Johari Darwaza tesem nung alirtem aonung külemi sentepa longsotepa kazüba mapang yi ajemba sülen atalok, ta police ketdangser kati IANS dang ashi.
Parnok iba yi jemli yongi saktsütep aser tenük agi junga mangur mesüra mangmanga saktsünütsü atur ta artep. Parnok ajak anasa aliba mozü ki kati anir ao, ajisüaka parnok pongubo süadok.
Tasürtemji Ram Avatar (59), Ateeq (35), Ramesh (38), Sarvesh (25) aser Netrapal (35) nunger lir ta jangjaogo. Ano tenük agi mangu akümertemiji Naresh, Vijay, Sarvesh, Kallu aser Arvind nunger lir.