Hindi oshi jembir tepseter Ulfa züngsem puogo

Guwahati, August 2 (Agencies) : Assam nung Hindi oshi jembir Nandlal Shah tepsetba mapa nung tongti süa tai tonglokja alisang Ulfa (Independent) telungpur John Asom puogo.
Brihostibar aonung Tinsukia district kübok Tarani reserve forest nung pa apu.
John dang Muhidhar Moran aser Ravan ta-a ajar aser pai July 14, 2015 nü Pengeri nung Shah den par jala tepset.
SSB, CRPF aser Army longjemer Tarani Reserve forest aser Dibrujan temeket nung bushitepa aodang John Asom apu.
“Pa ket nungi AK-81 Rifle ka, magazine 3, injang round 90, Chinese grenade ka, combat ammunition post, yangkhu ka nung Army combat dress aser mobile phone ana ngutetogo” ta SP (Tinsukia), Mugdhajyoti Mahanta-i metetdaktsü.
Arem-min asüba ajanga Ulfa(I) züngsem ana – Rupom Asom aser Udai Asom nabo jena otet, ta police-i ashi.
John-i police tsüngdang Pengeri nung nisung khasetdang pa dena liasü, ta nangzükogo.
“Ulfa(I) lennir aser lieutenant Ganesh Lahon-i John den nisung asem dang Shah-i sen magütsüra khasetang ta tetuyuba agütsü. Ganesh ya tang linük nung mali ama bilemer” ta police ketdangser kati ashi.
John apuba sülen Ulfa (I) publicity secretary Arunodoi Asom-ibo, mapang talangka John ji parnok den tongtepratep melii aru ta metetdaktsüogo.