Kabir Khan-i Salman Khan den ‘Tubelight’ film yanglutsü

Mumbai, July 17 (Agencies) : Bajrangi Bhaijaan film sayar küm ka ajungba sülen director Kabir Khan-i Salman Khan den ano taruba film yanglutsü atema sentong renemer.
“Kobi melii mapa tasen ka tenzüktsü” ta Kabir-i ashi.
Salman den külemi Ek Tha Tiger aser Bajrangi Bhaijaan film tajung ana yangluba sülen  Kabir-i Tubelight ta ser film tasen ka yanglutsü yongyar, ta metetdaktsü.
“BajrangiBhaijaan küm 1 ajungba atema tepela salem lemsatepba atema kanga pelar. #Tubelight tenzüktsü atema anogo 10 dang lir” ta Kabir-i Twitter nung metetdaktsü.
Yaküm July 17 nü Bajrangi Bhaijaan film saya aser iba nung Salman den Kareena Kapoor Khan, Nawazuddin Siddiqui aser tanur artiste Harshaali Malhotra nungertemi tongti shilem agi.
Salman-i tang Sultan film atema tenüngsang agir aser kobi melii Ladakh nung Tubelight atema mezüngbuba shilem tangoktsü ta osang angazüker.