MP tzümetsüng nung nisung 35 süogo

Bhopal, July 17 (Agencies) : Madhya Pradesh(MP) nung taoba hopta nungi tzünglu maneni aluba ajanga tzümetsünga nisung 35 süogo, 9 mangu bushidar aser nisung meyirjang aika pei aliba ki toktsüogo, ta Deobarnü ketdangsertemi metetdaktsü.
Iba tzümetsüng yaji nisung 300,000 dak kongshi aser parnok rongnung nisung 8,000 tashi pei telidak ki toktsür state sorkari khen atema jenoktsü asoshi yanglutsüba semto nung jenoka lir, ta ketdangsertemi ashi.
Tzüngmetsüng agi ki 2500 shi kanga mejungi raksatsüogo, ta sorkar osang ka ajanga metetdaktsü.
Madhya Pradesh nung district 51 lir aser item rongnung district 23 tashi iba tzümetsüng yagi kongshia lir.
Ketdangsertemisa ashiba agi, June 1 nungi July 16, 2016 tashi district 33 tashi nung tzünglu akhi mapang dang nungi tesahiba alu, 14 nung teti aluba ama alu aser pezü nung teti aluba dang nungi tajemba alu.
Iba tzümetsüng yagi State yimtiba Bhopal nung alirtem dak timba kongshia lir. Tasür 35 rongnung Bhopal nungi parnok pongu densema lir. Iba den külemi Panna aser Jabalpur district tem nung nisung tenetnet (7 each) süogo.
Tang mangu bushitepba parnok 9 rongnung parnok pongu Rewa district nung Tamsa ayong metsüngba mapang ponger ao. Parnok ya iba ayong tzüküm nung picnic chiyunga lia ponger ao.
Taküm akhi mapang dang nungi tzünglu tesashiba aluba district 33 ji Jabalpur, Katni, Chhindwara, Seoni, Mandala, Narsinghpur, Sagar, Damoh, Panna, Tikamgarh, Chhatarpur, Sidhi, Satna, Indore, Alirajpur, Khandwa, Ujjain, Mandsaur, Ratlam, Dewas, Shajapur, Murena, Shivpuri, Guna, Ashoknagar, Bhopal, Sehore, Raisen, Vidisha, Rajgarh, Hoshangabad, Harda, aser Betul district tem lir.