Taoba Tir Kalam nüngtem nung tamangba yimsü ajak senden kaogo

New Delhi, August 02 (Agencies): Taoba mapang linük Tir aser asür, A P J Abdul Kalam nem akhüm agüja New Delhi nung tanü tamangba yimsü ajak nungi lenirtem sarasadema senden ka ayongzüka kaogo.
Sabang ka nungi Hindu, Muslim, Khristan aser Sikh tamangba yimsü nung tekolakpurtemi sarasadema liasü.
Acharya Lokesh Muni, Jainacharya aser Ahimsa tentetsang, Vishwa Bharti-i, “Dr Kalam ya scientist ka dang nungibo tamang nung tashi taitba liasü. Tan puto nung pa ya tamangba aser science na tsüngda apu latsür ka ama bilemtettsü,” ta ashi.
Bhrigu Foundation tentetsang, Goswami Sushil Ji Maharaj-ia, sensakertem asoshi Kalam ya Tir ka liasü, ta ashi.
“Pai nüburtem asoshi Rashtrapati Bhawan kishi lapoktsü aser parnok den sensaksem,” ta Maharaj-isa ashi.
Ano Muslim yimsü lenir Maulana Kalbe Rusad Rizvi-i ashiba agi, Kalam-i meimchir meimba yimsü nung amang, pai (Kalam) Hindu mesüra Muslim ka masüdang, mezüng meimchir ka asütsüla ta ashi.
Iba sarasadem senden nung adener ajaki, Kalam-i sayuba ama, terenlok aser yimjung atema ajaki adianu ama alitsüla ta bangjemtepogo.
Iba senden ya Ahimsa Viswa Bharti, Ahimsa Foundation, Vishwa Ahimsa Sangh, Rajasthan Mitra Parishad, Rajasthan Sanstha Sangh, Sahyog Delhi aser Rachnatmak Manch tentettemi ayongzüka liasü.