ACAUT ama inyakdaktsüner !

Tang Nagaland nung ochimashi anema ACAUT teloki kanga sashia inyakba ngua lokti tentet ajaki yamai inyak nungbo jungla ta repranger. Iba jagi taoba hopta nung asenoki ” Nagaland nung kaketshir telongjemtemi tang ACAUT teloki inyakba ama inyak nunga koma süla ?” ta asüba tasüngdangba nung shisalemsatepogo. Aji oda,telangzürtem ajaki amato kaketshir telongjemi dang masü saka lokti tentet aser senso ajaki ochimashi anema inyakba nung shilem agitsüla ta asüba tangatetba lemsatepogo. Atangji, nisung shingaia ochimashi mapa meinyakner saka nisung aikati inyaker. Ibaji ochimashi mapa nokdangertem maliba ajanga lir. Ochimashi mapa inyakbaji majung ta jembibaji balaka saka ochimashirtem anema nokdakbajibo ano kenyongi balaka lir. Aji oda, asenoki ochimashi mapatem anema jembiba nungbo junga jembitetter saka ochimashi inyakertem anemabo menokdaktetter. Ibayongji, asenoki ochi tongpang nung takok mangur. Atangji, ochi tongpang nung takok angutsüba ya tasak kechiyong ochimashi anema raratsübaji ochishir asütsüla. Ibayongji, aiben asenoki tang ama telok kari ochimashi mapa anema ola adokdang parnok dakji temulung melemi bilemer. Aji oda, ACAUT purtemi tang yamai sashia inyakyonga kenlirbo ola makai akümtsü, kaketshir telongjemi ochimashi ochimashi mapatem anema nokdakyonga tatem matongtsü, kechiyong parnokji senyong yokadoktsü ta temulung melemi bilemer. Tanü asenoki asen lima nung tim masüba aser ochimashi mapatem anema takok ngua meinyaktetbaji asenokibo ochimashi aser tim masüba mapatem anema ola madoker saka shirnoki ochimashi mapatem anema inyaker parnok daka temulung melemtetter ta asüba tashimait ajanga lir.Aji oda, asenokia meinyaker aser tangar daka temulung malemer ta asüba tashidak agi tanü asen lima shirangdagi. Shitakba agibo tangari inyakbaji asenok ajak ajungtsü asoshi inyaker süra parnok dak temulung melemi repranga atatsü agibo asenokang parnok den longjemer külemi tasü itshidakja inyakba tajungba asütsü. Koba telok südir süang tanü ama lokti menentsüba aser nübortem akoksadaktsüba ochimashi mapatem anema inyakbaji ajak ajungtsü atema mulungtetter inyaker asünungji, ibaji parnok kija mapa mesüdaktsütsüla. Ashiko, asenok karibo Nagaland nung ochimashi aser tashiyim amshiba anema inyaktsübaji “kü mapa masü, ACAUT mapa, NSF mapa mesüra AKM mapa,” ta bilema alitsüa akok, ajisüaka asenok teyari medeniang item teloktem jagi asenok asoshi takok ngua meinyaktettsü. Asenoki bilemba amaji mapa ka teinyakdak nung parnok tatidang nung tsükadokra mesüra tashimait kümadokra, ibaji parnok tashimaitba agi masü saka asenoki tashimeitdaktsüba agi asütsü. Asen lima aser lokti nung ochimashi mapa anema nokdaktsübaji senso shia mapa lir. Asenbo lendong malidak aser nüngsen magidak ajemajema alitsü. Asen lokti senden jatepdagia maotsü, alima ajungtsü asoshi nüboa kata magütsütsü, senjang kata metenlatsü, auyi pongloka asentzü sena menokdaktsü aser lishi mezüa mesenzütsü, saka tangari dang asenok asoshi ochimashi anema nokdaktsütsüla aser tangari dang asenok asoshi alima tajung ka yanglutsütsüla ta bilema ataba agi tanü asenoki ochimashi anema raraba tongpang makoker. Aji oda, loktiliba nung asenok temelenshi tajung bener arutsüba nung shilem agir masü saka shilem agir aitsürtem dang süra iba jagi asen lokti kodanga majungtsü. Tanü asen lima mejungi akümba ya jungdi süra asenok pei kidang nungi adoktsüla aser ajemajema melii ola adoktsüla. Alima raksaba ya nisung tamajungertemi raksar masü saka nisung tajungertemi mapa tamajung anema menokdakba ajanga raksar ta ashiba otem agi asen mulungjang nung teti jembidaktsütsüla. Joko asenok ya tangar aija repranger ka masü saka ACAUT ama ochimashi anema nüngsen aser lendong tizükteta inyakertem akümtsüla. Ibai kidang mena yur tangar aija kazüba mapang masü saka kidang nungi adoker tim masüba dang tim masüa ta aija metongshitsütsüba mapang lir.