Gari totzü den kerosene meyokteper ayokertemji mechioktsüla : Naga Hoho

Dimapur, July 17 (TYO) : Tawa Dimapur nung gari totzü den kerosene meyokteper ayokertem putettsüsa inyakba mapaji kanga junga inyakogo aser inyakertem nem tenüngsang agütsür aser ano, tang iba maparen nung shirnok pua ali, parnokji mechioktsüla aser lawyer-temia nübortem külakoktsüba mapa angateta parnokji bail nung chioktsü asoshi shingaia mejembitsütsüla ta Naga Hoho sangdong ka ajanga metetdaktsüogo.
Ajisüaka, ACAUT teloki magizüktetaka, iba maparen bushisüngdangtsü asoshi governmenti shimba SIT telokji shitak shimogo, anungji parnok jagi memenui nübortemi agizüktettsüsa mapa shitak inyaka sayutsüla ta Naga Hohoisa metetdaktsü.
Nagaland nung totzü meshitak ayokba ya ajak nung lir, anungji district ajak nung tetendangtsü purtemi tendangtsüla. Kechiba iba ama nübortem ashiokja inyakba mapa ya nübortemi puteta magütsü tashi government kübok inyakertemibo mebushir aser metendanger ta Naga Hohoisa tasüngdangba ka agütsü.
Nagaland nung ya totzü dang masü saka dokan nung mapang süiba chiyongtsü  tamajung kanga ayoker saka itemjia tetendanger mali odang yokdaktsür, item jagi, ashiko, nisung aika tepseter alitsü ta parnokisa metetdaktsü.