ISIS kiralongrartemi India nunger dang ‘Onoki tesayurtem akhümtsübur’ ta ashi

New Delhi, August 02 (Agencies) : Alima ajungalen nisung tajungtemi dang masü saka kiralongrartemia tesayurtem akhümtsübur.
Libya nung Islamic State kiralongrartemi India nunger pezü apuba sülen ana chiok aser tena rongnung nisung kati ashiba agi tena tesayur mapa inyakba ajanga chiok.
ISIS-i chiokba India nunger nisung ana rongnung kati osangbener dang ashiba agi kiralongrartem jagi tena tesayur inyaker ta metetba sülen chiok.
“Küna tesayur mapa inyakba ajanga kümzük. Onok apurtemi ashiba agi parnoki tesayurtem akhümtsübur, kechiyong tesayurtemi Libya nung tanur aika angazükdaktsür,” ta Sirte University nung tesayur Vijay Kumar-i ashi.
Taoba Bodbarnü Kumar aser Laxmikant Ramakrishna na den India nunger ana ISIS kiralongrartemi Sirte anasa checkpoint ka nung apu.
“Onok taxi ana nung mener airport-i aodang len tom nung prangpong amertemi gari soter onok apu. Iba sülen onok meta balakati anir ao aser onok indang khu lapoka reprang,” ta Laxmikant Ramakrishna-i ashi.
Iba sülen ISIS kiralongrartemi par pezü taktang tammang ka nung shibanga ayu.
“Taktang telung nung ‘Sheikh’ ta ser nisung kati onok dang asüngdangya asü. Pai onok tamangba yimsü indang asüngdang aser iba sülen phone ajanga nisung ka den jembi. Mapang tatsüka lir külen pai onok chioktsü ta ashi,” ta Kumar-isa shisem.
Deobarnü India nunger anaji Sirte toktsür Tunis-i aotsü aser idak nungjagi August 3, 2015 nü India-i arutsü.
Ajisüaka, tena den külemi apuba Balram Kishan aser T Gopikrishna na tang tashi ISIS pur ket nung yua lir aser India sorkari tena chioktsü atema mapa teinyaktak lir.