America nung tensa tajungba kümdaktsütsü nangzüker: Trump

Cleveland, July 22 (Agencies): Republican yimtenren telok nungi US Tir menden asoshi candidate ama toktepsang, Donald Trump-i par America linük ajunga nung tensa tajungba kümdaktsütsü aser nübur nem terenelok aser yimji yimjung agütsütsü tenangzükba olen ka yashi, Brehostibar nü metetdaktsüogo.
Ohio state kübok Cleveland nung agiba Repbublican telok mongdang nung par telok nungi US Tir menden atema candidate kija kümtsüba onük agizükdang Trump-i iba olenji metetdaktsü.
“Asen nüburtemi ni Tir shimra, asen America linük ajunga nung tensa tajungba kümdaktsütsü nangzüker. Ano, ozüng alema inyaker aser ozüng alema America nung jenoktsü asoshi aruba migrant nisungtem nokdangtsü nangzüker,” ta Trump-i yashi minute 75 shi agia onük jembidang sangoktsü.
“Democratic telok nungi Tir candidate, Hillary Clinton-i tasüba, teraksa aser kiralongrar den sentakba senmang America linük atema yuja lir,” ta shia, Trump-i Hillary aitsüba olen ka metetdaktsü.
“Asen Tir, Barack Obama-i America’er bendang mapatong ajunga ketdang asütsü asoshi Hillary shimba sülen asen linük jenjang taoba mapang nungi tang tamajungba kümogo. Anungji, taküm December ita agitsü renemba Tir election nung asenok ajaki ka küma lungjemer Hillary tsükdaktsütsü ayongzüker,” ta arishi küm 70 tain Trump-i mongdanger ayongzüka liasü.