Tanü Rajnath-i Kashmir semdangtsü

New Delhi, July 22 (Agencies): Honibarnü nungi tenzüka Union home minister, Rajnath Singh-i anogo ananü Kashmir semdangtsü, aser iba mapang nung pai Kashmir tensa reprangshia tensa süngjemtsü atema o lemteptsü.
Honibarnü anüngdang 11:00 ako meta Union Minister, Rajnath Singh Srinagar yimti atongba sülen pai Chief Minister Mehbooba Mufti den tongti ketdangsertem ajurua Kashmir Valley tensa reprangshitsü.
Iba sülen pai yimtenren party balala nungi lenirtem, lokti tentet balala nungi lenirtem aser lenla balala nungi sensotem ajurua Kashmir tensa indang jembitsü, ta ketdangser kati metetdaktsü.
Yashi Parliament nung Home Minister-i, pai Kashmir semdangtsü aser lenla balala nungi sensotem ajurua jembitsü, ta metetdakja liasü.
“Kashmir tensa süngjemtsü atema onoki takok ngua inyaktettsü ta melung lema lir,” ta Singh-i metetdakja liasü.
Singh-isa, Kashmir nung tensa tamajungba akumtsü atema Pakistan-i tongtibang shilem agia lir, ta aija liasü.