Liam Payne-i One Direction toktsür

Los Angeles, July 21 (Agencies) : One Direction kentener Liam Payne-i July 21, 2016 nü pa solo aotsü indang osang mezüng metetdaktsü.
“Ni Capitol Records UK den tenangzüktep ka agiogo. Frank Sinatra nunger mapang nungi Capitol Records indang putiotsü tesüngmangtsü tajung lir aser ni parnok indang otsü nung shilem ka asütsü maongka anguba atema kanga pelar” ta Liam-i ashi.
“One Direction ji kibong ka ama ni meimtsü aser ni solo artist ka sütettsü ta asüba sayutsü kanga yongyar” ta paisa shisem.
Capitol Records UK president, Nick Raphael-ia, “Capitol Records UK-i Liam den inyaktsü mapang anguba atema kanga pelar. Alimai metetba aser sempet aketba arishi küm 22 tain ka den tenangzüktep agiba maongkaji ulura” ta metetdaktsü.
Anogo ishika tejaklen, Liam Payne-i hip-hop kentenertem – Wiz Khalifa aser Juicy J na den külemi menüngokba ken ka online nung leak süogo.
British nunger tebur kentener telok One Direction-i parnok mapang tatsüka atema anisüngzüker ta ashiba sülen ita ishika lir, telok toktsür tesübubaji Liam lir.
One Direction telok nungi mezüngbuba züngsem pilabaji Zayn Malik liasü. Iba sülen taküm March ita pa indang solo kensep ‘Mind of Mine’ sayaogo.
‘The X Factor’ ta ajaba TV talent sentong nung takok anguba ajanga The Beatles sülenbo British boy band tulutibaji ‘One Direction’ lir. Alima nung parnok indang kensep million 20 den tema yokogo.