Train ticket mali jajartem dang nungi senchi sen crore 12.06 sarutetogo

Agartala, July 22 (Agencies) : Northeast Frontier Railway (NFR)-i April nungi June ita tashi nung ticket mali mesüra tim masüba yimya nung train nung jajartem anema case 171,578 benoka liasü aser item nisungtem ket nungi senchi sen crore 12.06 sarutetogo, ta Hokolbarnü NFR ketdangser kati metetdaktsü.
2016 aser 2017 atema mezüng quarter mapang anogo shia iba ama ticket malirtem, average nung 1,910 putet aser yaküm quarter mapang kasa case anogo shi, average nung 1,440 puteta liasü, ta NFR data nung lir.
NFR nung Public Relations Officer S K Ojah-i, “North East tesem nung April nungi June ita tashi nung, mela aliba dang nungi khu talila bener temelaba mali jajartem 13,467 tashi putet. Iba tatalokba ya timba ka Assam nung liasü aser item nisungtem dang nungi senchi sen lakh 16 tashi sarutet,” ta metetdaktsü.
“Tarutsü nunga maneni iba ama ticket tejangja mali train nung jajartem aputsü atema tali tashi ita inyaktsü,” ta Ojah-i ashi.
NFR ‘flying squads’-i train anenba tesemtem nung ajungbena train mita oa ticket tejangja maliba passenger tem apur.
“Ticket mali train nung jajartem putettsü atema NFR-i system kar inoka lir aser ajungbena flying squad temi mita aoer,” ta Ojah-i shisem.