Clinton-i lar Tatong Tir atema Kaine shimogo

US kübok Northern Virginia nung agiba election nüboyimtsü sentong nung Democratic yimtenren telok nungi US Tir menden atema candidate ama tokteptsü jenjang ngua alila, Hillary Clinton aser US Senator, Tim Kaine nati aroki shilem agiba noksa ka yangi angur. Clinton-i lar Tatong Tir inyaktsü asoshi Kaine tan Hokolbar nü shimba osang jangjaogo. (Virginia, July 23)

Washington, July 23 (Agencies): Democratic yimtenren telok nungi US Tir menden asoshi candidate ama toktepla, Hillary Clinton-i lar Tatong Tir menden bendaktsütsü nükjidong nung US Senator, Tim Kaine yashi, Hokolbar nü shimogo.
Linük yimsü asütsü tajangshiba jenti angu alisang, Kaine Tatong Tir atema shimba ajanga Democratic telok nung züngsemer independent aser moderate-tem peladaktsütsü lir saka Kaine ya Asia den tetsükdakba kecha meli shishilembatsü onük benokba yimsüsür ka aliba yong liberal telokibo Clinton aser Kaine na bilemba amabo pusema meyaritsü akok.
Ajisüaka, nungdak dang adokra, Tir mendena bentettsü lenir aginüla, Clinton atemabo taoba Virginia governor aser Richmond mayor, Kaine ya tapet yimsüsür ka lir.
Arishi küm 58 tain Kaine-i New Jersey nungi US Senator, Cory Booker aser Agriculture Secretary, Tom Vilsack na den temaba jenjang nua, tan Clinton den Tatong Tir ama yaritepa par US linük madak yimsüsü asütsü temten anguba osang jangjaogo.
Ano külen, Republican yimtenren telok nungi Tir menden asoshi toktepsang, Donald Trump den jenjang tajungba ngua alila, taoba US Secretary of State, Clinton lar Democratic telok nungi US Tir menden atema candidate tatem küma shimtsü maparen Philadelphia nung taruba hopta amentsü ayongba Democratic telok mongdang nung agitsü sentong renema lir.