Caterina Murino-i India tsür tashiyim agi raksatsür alirtem atema bilemtsür

Noida, July 23, 2016 : James Bond film “Casino Royale” nung shilem agila, Italy tsür actress Caterina Murino-i, India nung December 2012 nung tebur telok kati tetsür tashiyim agi raksatsüba otsü anagshiba sülen la amao motet, ta ashidang India sorkari tetsür tashiyim agi raksatsüba azüoktsü atema ozüng tesashi kar yanglutsüla, ta shisem.
La ya Bollywood nung tan mezüngsüa “Fever” film nung shilem agia lir.
“Casino Royale” film nung Solange Dimitrios ama shilem agila Caterina-i Hokolbarnü “Fever” ajungkettsü atema IANS headquarter semdangdang India tsür kümzüka ayutsü nüngdakba jembidang nüktzü alua liasü.
“Ni iba ya meshi-i India nungi maotsü…..2012 December nungi ni India tsür tebilemtsütem atema kanga shishia bilemtsür. New Delhi nung tetsür tashiyim agi raksatsüba angashiba sülen iba tetsür koma timtemer alitsü ta bilemdangdang ni ita junga amoa junga motet. Iba sülen nungi tia kar maka ka tetsür ajak longjemer tashiyim agi tetsür raksatsürtem temerenshi tali tuluba agütsütsü atema sorkar dang asüngdangtsü lemtetba kaket kar ni züngshi,” ta lai ashi.
“Sorkar aser Ato Kilonseri ibai atema kanga aroka ia bilemdanger tapet inyaktsüla,” ta Africa nung nüburtem temeden atema inyaker actress, Caterina-i ashi.
New Delhi nung December 16, 2012 nü tebur telok kati arishi küm 23 tain, tetsür physiotherapy ka bus gari telung nung tashiyim agi raksatsüba ajanga alima rangben matsüngdang India atema maksü tulu bentsür aru.
Caterina-i iba tetsübutsü otsü angashiba sülen iba otsü tali jangja metettsü merang. Iba ama maksütsü mapa tamajung inyakertem dang ‘tebur’ ta ajatsü malang, ta lai ashi.
“Iba ama tatalokba süoki ia nokdangtsü atema sorkari Police tem nem tetuyuba agütsütsüla,” ta laisa ashi.
“Ato kilonser-i anir sorkari ibai atema ozüng balaka yanglutsü nüngdak. Ibai nokdangtsüji tesayuba tajung agütsüba daka tuluka keta lir. Tetsür tashiyim agi raksatsüra ozüng agi merenshiba dang masü saka iba ama inyakbaji temenen ta school mapang nungi teburtem nem angatetdaktsütsüla aser ibaji atema school tem nung sentong balala yanglua tesayuba agütsütsü nüngdak,” ta Caterina-i ashi.
Caterina ya tang lai Rajeev Khandelwal aser Gauahar Khan na den külemi shilem agiba ‘Fever’ film ajungkettsü atema India nung arua lir. Iba film ya August 5, 2016 nü sayatsü.