MLA Vikho-o NPF nung aniokogo

Kohima, July 23 (TYO): 14th Southern Angami-1 Assembly Constituency nungi MLA, Vikho-o Yhoshü tanü NPF nung official süa denogo.
NPF Kohima Division-i Kisama Heritage Village nung coordination programme ka ayongzüka agidang NPF nungi lokzüka aoba MLA Vikho-o tanaben NPF nung aden.
NPF Kohima Division osang ka ajanga ashiba agi, MLA Vikho-o ya Sovima camp nung aden aser yaküm küm tatemlen par constituency party workers den külemi NPF nung aden saka pa tanaben party nung anioktsü atema ita ishika agi.
Tanü Vikho-o-i o jembidang, pa Sovima camp nung adenba atema sasa bilemba metetdaktsü, ajisüaka mapang shitak nung NPF party nung tanaben adenba atema kanga pelar, ta paisa shisem.
“Ni nübo timbalen ta bilema Sovima camp nung aden saka kü indang ongko meshidak liasü aser ibaji atema tanü tashi ni kanga sasar” ta Vikho-o-isa ashi.
Tanü Naga nunger len anitsüba telokji NPF lir anungji NPF yimsüsür tsüngda putepshitsüla aser külemi longjemtsüla. Ano Naga nungertemia NPF party lennirtem dak teimla ayutsüla aser tamang katettsüla, ta paisa ayongzük.
“Ni mapang talangka atar telemtetba shitak agi aser iba atema NPF Kohima Division-i lenmang lapoktsüba atema kanga pelar” ta Vikho-o-isa metdetaktsü.
Sentong nung Social Security & Parliamentary Affairs Minister aser NPF Kohima division incharge, Kiyanilie Peseyie-i Vikho-o Yhoshü aser pa sülen anidakertem pela agizük.
NPF yimsüsürtem tsüngda yimten tsütsü mangatettep aliba atema Peseyie-i sasa bilemba metetdaktsü aser paisa NPF party züngsemtemi NPF-i aniba DAN sorkar tashi itshidaktsütsü atema longjemer inyaktsü ayongzük.
“Telemsa ajanga asenoki tejakleni maotsü” ta Sirie-i ashi.
Sentong nung NPF Kohima Division president, Goneiu Sirie-ia, Vikho-o aser constituency workers NPF nung tanaben adenba atema pelaba metetdaktsü.
Iba sentong nung mendenji NPF Kohima Division Working President Kesoneilie Theünuo liasü, NPF Kohima Division Treasurer Suosahie Sachü-i temoatsü meshia sarasadem aser Vice president NPF Kohima Division Vira Lhousa-i anküp tepela o jembi. Sentong nung Forest, Environment & Climate Change Minister, Dr. Neikiesalie Nicky Kire-a aden.