Kaketshir 7 nem asür N.I Jamir Academic Excellency Award agütsü

Kohima, July 23 (TYO): Ongpangkong Telongjem Kohima (OTK)-i asür, N.I Jamir nem tetushi agüja ayongzüka agiba Academic Excellency Award sentong nung Aor kaketshir HSLC toppers 2016 tenet nem sempet agütsüogo.
Iba sentong ya July 23, 2016 nü Molu Ki Kohima nung agi aser tongti tesemdangerji, Director & DIGP Vigilance, I. Meyionen liasü.
Sentong nung I. Meyionen-i takok angur ayongzüka jembidang, asür N.I Jamir Academic Excellency Award anguba atema tenüngsang agütsü aser kaketshir ka indang teinyaktsü onük kar lemsatep.
“Pei sasa mulungtetba, pei dak temulung lemtetba aser tamang katetba ajanga tematiba takok angur. Anungji kaketshirtemi pei alizüng nung temulung agütsütsüla aser tarutsü nung ibaji tongtettsü atema tangar dang nungi talila merangtsüla,” ta pai ashi.
“Tanü putu nung technology ya kanga tongtibang saka social media aser technology dak sendakba maparen ajanga nenok azüngba nung timtem majurudaktsütsü merangang,” ta Meyionen-isa ashi.
“Takok tulu angutsü atema ajemalu, taremzük, shisatsü, yimyayimpong tajung aser meranga inyakba tangatetba alitsüla,” ta Meyionen-i ashi.
Abraham Lincoln USA Tir makümdang pai taküm nung timtem aser tokrong ajuruba indang otsü nung ajemdaker Meyionen-i kaketshirtem dang tangar dang nungi balaka asütsü aser temelenshi bener arur ka asütsü ayongzük.
Sentong nung asür N. I. Jamir’er kibong tenüng nungi jembidang, Adviser to Chief Minister, Merentoshi R. Jamir-i takok tajung anguba kaketshirtem nem tenüngsang agütsü aser “tanü nungi tenzüker nenoki loktiliba yanglutsü atema tebilemtsü khuret benloker” ta pai kaketshirtem dang ashi.
Merentoshi-isa tsüraburtem dang pei tanurtem lenmang shitak nung anitettsü atema tayongzükba agütsü.
“Asen state nung zünger mapa manguba khuret lir, anungji pei tanurtem mapa angazüktsü aser pei sasa liyonga otettsü atema tsüraburtemi tim tesayuba agütsütsüla,” ta pai ashi.
“Asür N.I. Jamir ji ketdangser tajung ka aser yimsüsür mongin ka liasü.  Anungji,  kaketshirtemi pa taküm nungi ajizüktsüla,” ta Kohima Aor Telongjem President, Talituba Sanglir-i o jembidang kaketshirtem ayongzük.
Talituba-isa takok tajung anguba kaketshirtem dang tarutsü nunga takok tulu angutsü atema tali nendaka merangtsü aser tashi angatsü tayongzükba agütsü.
Sentong nung OTK Tir, N. Abong Pongener-i sempet agütsüba indang osang tatsü agi metetdaktsü aser iba sülen tongti tesemdangeri sempettem lema agütsü.
Sempet angurtemji Miss Tongpangtangla (Rank 10), Miss Limasangla Walling (Rank 13), Miss Subolemla Pongener (Rank 14), Miss Pangerremla (Rank 15), Miss Arenjungla Pongen (Rank 16), Mr. Nungsangmanen Longkumer (Rank 19) aser Mr. Alemzungba Jamir (Rank 20) nunger lir aser parnoki takok anguba indang osang lemsatepba den N I Jamir Trust Board dang pelaba metetdaktsü.
Late N.I Jamir Academic Excellency Award angur shia nem kulikaket ka den sen meyirjang 10 senpet agütsür.
Iba sentong nung Associate Pastor KABA Temjen Sempo-i temoatsü meshia sarasadem, Kohima Ongpangkong Students’ Union-i ken ka aten, OTK General Secretary Panger Atsongchanger-i anküp tepela o jembi aser Kohima Watsu Unit Tir, O. Chubala Jamir-i sarasadema tembang.