Delhi aser Gujarat na longjemer BJP anema raratsü: Kejriwal

New Delhi, July 24 (Agencies): Gujarat election nung AAP-i shilem agitsü nükjidong yur tanü AAP tongti aser Delhi Chief Minister, Arvind Kejriwal-i, sangküm anüolen aliba state (Gujarat) Assembly election osang ajanga nisung aika süngmangdaktsütsü aser tanbo Delhi aser Gujarat nati senteper BJP anema raratsü, ta ashi.
Tawa Kejriwal-i Gujarat anaben semdanga liasü aser pai, chief minister Anandiben Patel-i aniba BJP sorkar dang state nüburtemi kanga jashir, ta ashi.
Twitter ajanga Kejriwal-i, “Gujarat-i Anandiben Patel aser BJP dang kanga jashir. Sangküm Gujarat election osang ajanga aika süngmangdaktsütsüa akok. Tai ken otem nung Anandiben-i dalits aser patidar tem tepuokdaki yoker, ano külen Delhi nung Modi-ia kasaji inyaker. Tanbo Delhi aser Gujarat nati senteper raratsü,” ta ashi.
Kejriwal-isa, Dalit nunger anema inyakba tatalokbatem nung Ato kilonser, Narendra Modi-i ola madokbaji ajanga, item tatalokbaji BJP bangdak lenirtem tetuyuba nung inyak ta kuli sayur, ta tai tongloktsü.
Taoba hopta ‘Talk to AK’ sentong nung jembidang Kejriwal-i, Gujarat nüburtemi dang melungra AAP-i election nung toktepsü, ta metetdakja liasü.
Paisa, Gujarat nung BJP ji “Dalit-anemertem” ta ashi aser sorkar tashi nung aliba BJP-i tepetzük tia nung alirtem ajemshir, ta shisem.