Joko asenoki ayoktsüla !

Taoba hopta nunga iba osangkaket ‘Koma Süla” tapak nung asenok rongnung, ” Asen lima nung hopta bazaar-tem ya memendaktsü  nunga koma süla ? ” ta asüba tasüngdangba nung shisalemsatepogo. Iba tasüngdangba nung telangzüba agütsürbo nisung 25 dang liasü, ajisüaka iba osangkaket azünger ajaki tebilemdangbo bilemdanger südi ta amanger. Aji oda, asen lima nung hopta bazaar ya amentsüla mesüra mamentsüla ta asüba onük nung pei pei angatetba tebilembatem tesem tesem nung benoka sensaksem mapang agir alitsü imlar. Asenok sobaliba nung osangkaket nung adokba osang mesüra ocettem zünger pei pei angatetba aser tebilembatem yimozülur dangi züluba mali, anungji mezülur. Ibayongji, tezüluri tapu tapu züluaka aser asüngdangaka nübortem tebilemba mangur, iba jagi asen lima nung temelenshi tajung bener marutetter. Alima nung nübortem rongnung tebilemba süoktepa jembi nungang telemtetba tajung ka agitetter. Aji oda, yimsüsür tatartem atemabo tatar senden lir saka nübortem adenshia o lemtepdakbo osangkaket ya dang asütsü. Ibajia tanü nübortemi mulungba yimten yimli democracy aliba ajanga lir. Iba ama yimten yimli malidakbo osangkaket adoktsüa memelar aser adokyonga government-i mulungba osang dang adoktsü melar.  Aji oda, osangkaket nung kechi zülunür zülutsü aser kechi adokner adoktsü ta asüba ya senso shia asoshi yimten aser lokti nung shilem agitsüba maongka tulu ta angateta tazüngertemi kanga jangrabangraa shilem agidaktsüner. Atangji, aikati aginür saka nüngsen maginür mesüra peisasa pei ilaa bilemer. Item ajakji nisung ka tejakleni moudaktsüba shisatsü aser tashidak lir ta metetdi. Atangji, tangang asenok shisa tenük lapoker asünungji, memetetba asüngdangtsübaji nungnanger aser meteta alibajia lemsateptsü nüngdak mali amai bilemer. Iba ama tangang aienba loktiliba ka nung osangkaket ajanga shisalemsateptsü ayongzükba onük nung nisung 25 tashi agi shilem agibaji tenük sünga bilemer. Tang item telangzür 25 rongnung tera teimbai hopta bazaar memendaktsüang tajungba ta langzüogo. Ajisüaka, ano mendakdaktsütsüla ta bilemertemia tzümartem nem masü saka asenok nisungi amentsüla ta asüba tangatetba tajung agütsüogo. Iba denji ano kasa oset nungsa asüyonga asen nisungi tzümartem dang nungibo sentak teimba meshir ta asüba ochi o ka lemsatepogo. Atangji, Naga nunger akhi tsürabur mapang  aser talisa Aortem sobaliba nung aonsutsü, chiyongtsü, tula süoshi aser kiojen yangluba osettem ayokba aser aliba yimya mali. Iba jagi tanü tashi asenoki ayokba aser aliba shishilembaba mapa inyaktsü kangabo mejangrar südi aser inyakyonga tsümartem den kasasa junga meinyaktetter. Ajisüaka, asenoka putu mapang melenshiba den külemi inyakyim aser sobaliba melenshia aotsü nüngdaker asünungji asenok aika shishilembaba mapa tenzüka inyaktsüsa akümtsü. Item rongnungji dokan amenba aser anogo shia bazaar mesüra hopta bazaar amenba mapatem ya asütsü. Atangji, tanü hopta bazaar amenba ya junger majung ta asüngdangbaji hopta bazaar-ji majung masü saka hopta bazaar nung amenertemji asenok masü saka tsümartem dang, anungji asenok ajak talir aser parnok tayoker ta asüba hopta bazaar ajangabo asenok tajangzük dang nungibo takoksa tuluba angur ta angatetdaktsüner. Iba tasüngdangba yagi telangzür tajung kari ashi ama, hopta bazaar-ji asen nisungtemi tesem balala nung chiyongtsü aser oset tapu balala bener arua ayokba bazaar ka asütsüla. Hopta bazaar aliba agi asen akaba senotsü ajak tsümartem nem agütsü saka asenok nisung anogo shia bazaar amenertembo takoksa ajuru ta asütsüsa masütsüla. Aji oda, joko asenokia tsümar o jembitetter aser oset abenba garitema peria lir, anungji hopta bazaar ya mendi süra asenok nisungtemi amentsüla aser telangzür kari ashi ama, oset aser chiyongtsü jenjangji yimteni latettsütsüla. Iba amaji asenoki asenoksasa meinyaktet tashi asen lima nung tsümartem nembo hopta bazaar memendaktsütsüla.