Aoyimti, Dimapur nung angati medical camp ka agi

Dimapur, July 23 (TYO) : Honibarnü Aoyimti, Dimapur nung Longchen Development Welfare Society (LDWS)-i medical camp ka ayongzüka agi aser iba nung HQ 3 Corps, Rangapahar; HQ 6 Sector, Assam Rifles aser 32 Assam Rifles nungeri yaritep.
Nisung 700 den temai angati medical up nung teyari agi aser iba sentong ya Aoyimti yimtsüng nung tain aser tanurtem ajangzükdaktsütsü nükjidong nung ayongzük, ta LDWS osang ka ajanga ashi.
32 AR, Lt. Col. (Dr.) Rajesh Kumar nungi Chief Medical Officer-i anir medical team den District Hospital, Dimapur nungia specialists-i yaritep aser Sub-Centre, Aoyimti nungi nurse temi AR nurse den yaritep.
Nisung 387 tashi temang anepalu aser AR-i agütsüba mozütem angati lema agütsü.
Iba sentong nung teyari tulu agütsüba atema 32 AR, HQ 3 Corps, HQ 6 Sector aser medical personnel ajak dang pelar ta LDWS-isa metetdaktsü.
Sentong nung CSD outlet ka lapok aser 32 AR-ia yimtsüng nung alirtem nem chiyungtsü agütsü, ta parnokisa shisem.
Iba sentong nung Commander, HQ 6 Sector, AR, Brig. Brijesh Dhiman aden aser pai yimdaklirtem den sensaksem.