India nung Samsung Galaxy Grand Prime 4G sayaogo

New Delhi, August 03, 2015: Samsung-i Galaxy Grand Prime tasenba sayaba ajanga India nung 4G inyakyim tuluba küma oa inyaktsü tenzükogo. Iba phone jenjang sen 11,000 alitsü aser sentsü tapu asem nung angutsü; temesüng, aut sentsü aser hon sentsü. Iba phone yagi Xiaomi Mi 4i, Moto G tasenba aser ibala mesükba phone tem den tokteptsü.

Galaxy Grand Prime nung 560 x 960 pixels aliba 5-inch qHD TFT display keta lir. Iba den külemi 1GB RAM keta aliba, 1.2GHz quad-core processor enokja lir. SIM card ana amshitetba phone nung ya 8GB internal memory lir saka microSD card ajanga 64GB tashi ulua kümtettsü.

Ajidang masü saka phone tesülen 8-megapixel aser tejalen 5-megapixel camera keta lir.

Iba phone ya 3G, 4G, GLONASS dena GPS aser microUSB tem den sentaktepteter.

Iba phone ya sayaba ajanga Samsung-i 4G telemsa model 14 küma yangluogo.

4G LTE device ajanga TDD aser FDD naprongla den sentaktepa inyakteter.

Phone tasenba ya gram 156 taret lir aser tasazükji 144.8 x 72.1 x 8.6 mm lir. Iba phone nung Android Lollipop 5.1 operating system enoka lir aser Samsung meyong Touch Wiz-a enoksema lir. Phone nung 2,600mAH Battery aliba yagi ghonda 14 tashi tashi agütsür.

Iba phone sayaba mapang, Samsung India Marketing, Mobile & IT nung Tating Tir Asim Warsi-i, “Samsung-i nüburtemi nüngdakba ama mapang dak apet oset yangluba nung bendanga agüja inyaker. 4G amshitetba Galaxy Grand Prime ya ajanga onoki nüburtemi aginüba ama smartphone sen talangba aser amshiyim tali tajungba kümdaktsür,” ta ashi.