Melangteper Narsingh Yadav dope asüba putet

July 24, 2016 : Rio Olympic nung shilem agitsü shimteta alisang melangteper Narsingh Yadav shibangtsür aliba mozü amshiba tendangba nung tsükogo.
Network of Alcohol & other Drugs Agencies (NADA)-i pa iba mozü amshiba osang metetdaktsütsü arendaka liasü ajisüaka Wrestling Federation of India-i temai adoka metetdaktsü.
Iba sülen, “Narsingh-i shibangtsür aliba mozü amshiba putetogo,” ta NADA Director General Navin Agarwal-i osangbenertem dang ashi.
“Pa natzü (A aser B sample) tendangba sülen pa iba mozü amshiba putet. B sample lapoka tendangba mapang Narsingh-a dena liasü,” ta Agarwal-i ashi.
Narsingh iba mozü amshiba tendangtsü atema July 5 nü azü-a tuzükogo.
‘A’ aser ‘B’ sample naprong positive putetba sülen pa yashi disciplinary panel tsüngdang nokdak. Parnoki iba dak sentakba nung osang tejangja ajak mashi.
Temang tuozük, seret 74 telemsa nung freestyle melangteper, Narsingh ya Rio Olympics nung shilem magitettsü akok, ajisüaka tang tangbo osang tejangja magütsütettsü, ta NADA-i ashi.
Onok NADA, WADA aser WFI nungi Narsingh indang osang tejangja angutsü atar,” ta IOA secretary Rajeev Mehta-i ashi.
Mehta-i, “Iba osang tejangja metettsü atema Olympic organising committee-i IOA den meneni jembidar,” ta ashi.
Rio Olympics atema Olympic medal ana ngua alisang Sushil Kumar masü Narsingh ang shimba sülen Sushil aria bilemtsürtemi nungshiba ajanga ibai atalok asütsü südi, ta wrestling federation-i temulung melemi bilemer.
Narsingh-i iba amai inyaktsü ni mamanger kechiba süra küm 10 tashi melangtepa aruba mapang pai shibangtsür aliba mozü khen tanga amshiba meputet. Iba ya telung tonga ia bushisüngdangtsüla, ta coach Jagmal Singh-i ashi.
Narsingh aser Sushil na tsüngda ken o adoka court nung raraba sülen nungi Maharashtra nungi melangteper Narsingh shisatsü nung kanga animesüngzükteti aküm. Narsingh anüktsü atema police dena agütsü.
“Ano pa tanaben tendangtsüji temetetba mapa lir anungji team rangben Rio-i moa tsüngda pa-a shilem agitettsüsa iba tebilemtsü ya tekaratiba nung bentet nungbo ajak atema tajung asütsü,” ta Jagmal Singh-isa ashi.