Arunachal & Assam nung tzümetsüng tensa tamajungba akümer

Itanagar/Guwahati, July 24 (Agencies): Arunachal Pradesh nung tsüngsang mopung temelenshi kecha makaba ajanga district aika nung tzümetsüng tensa tamajungba kümogo, iba den külemi tesem tasen aika nunga tzü metsüngogo.
State Chief Minister, Pema Khandu tetuyuba nung Honibarnü Deputy Chief Minister, Chowna Mein New Delhi nungi state yimtiba, Itanagar-i ilonga aruba sülen tzümetsüng agi kongshiba district tem- Lohit, Namsai, East Siang, Lower Dibang Valley aser Changlang semdanga liasü.
Chief Minister-i Mein dang iba tensa asadangang aser nüburtem nem teimla agüjang ta tuyu, ta sorkar osang ka ajanga ashi.
Iba tensa ya Khandu-i repranger, aser tamelen pai MLA tem- Mohesh Chai, Chow Zingnu Namchoom aser Laisam Simai nunger dang peipei district nung tensa reprangtsü tuyua liasü. Mein-i item MLA tem den maneni tongtepratepa inyakdar.
Noa-Dehing ayong nung tzü sashia metsüngba ajanga Lekang tesem ajunga tzü agi metsüngogo. Namsai jila aser temeket nung aliba yimtsüngtem tamajungba kongshia lir.
Noa-Dehing aser Jengthu ayong na nung tzü lendongbang nung yimdar, ta Namsai nungi osang ka ajanga ashi.
Chongkham tesem nunga tzümetsüng tensa tamajungba kümdar, kechiyong Lohit, Kamlang, Berreng, Tengapani ayongtem aser item ayong nung yimokba ayongnotem nung tzü taliba metsüngdar.
State nung tzümetsüng ajanga ayongküm li ponger aoba den külemi alu aser süngolu raksatsüba den kisetshiruru samadar.
Ano Guwahati nungi osang ka ajanga ashiba agi, Assam nung tzümetsüng tensa temelenshiba kecha mali, aser tanüa Lakhimpur district nung nisung ka süogo, ibaji densemabo taküm state tzümetsüng lendong nung ajak agi nisung tenet tashi süogo.
Honibarnüa Lakhimpur aser Morigaon na nung tzümetsüng ajanga nisung kaka asü.
Deobar nikongdang tashi nung tzümetsüng agi district 14 nung nisung lakh 6 dak tema kongshiogo.
“Tanü tashi nung tzümetsüng agi district 14 kübok yim 1,206 nung nisung 6,41,043 kongshiogo. District ketdangsertemi item district tem nung relief camp 81 lapoka nisung 21,931 jenokdakja lir,” ta Assam Disaster Management Authority (ASDMA) ketdangser kati metetdaktsü.
Central Water Commission ketdangsertemi ashiba agi, Dibrugarh, Neematighat, Tezpur, Golapara aser Dhubri nung Brahmaputra ayongtzü lendongbang nung yimdar.
Iba dak alia Burhidehing, Subansiri, Dhansiri, Jia Bharali, Puthimari aser Sonkosh ayongtem nunga tzü lendongbang nung yimdar.
Tanü Assam Angh, PB Acharya-i anünglen nungi item tesem repranga asadanga liasü.