Kevijau colony nung alirtemi gari lenmang nokdanger lungkak ait

Dimapur, July 25 (TYO) : July 25, 2016 nü Dimapur nung Kevijau Colony nung alirtemi ghonda ishika Signal-Thahekhu lenmang nokdanger lungkak ait.
Kevijau colony yimteni parnok kiyong telongtet nung gari tulutem anena mayutsü tetuyuba agüja lir aser tanep iba tetuyuba anema truck garitem anena yua aliba atema kiyonger lanurtemi aibelenertem indang gari japi meshia ayutsü merang saka idangji meyiper nisung pezüi lanurtem dak teka sangshi. Iba tatalokba nung ajemdaker Kevijau colony nung alirtemi gari lenmang noktang.
Kevijau colony council-i garitem (FCI carriers) lenmang tezülen anendena mayutsü tetuyuba agüja lir aser tashi mangartem dang nungi sen 500 senchi achitsü lateta lir.
Tanep lanur asemji iba duty inyaka liasü aser parnoki gari driver tem gari anir aotsü tetuyuba agütsü saka parnoki tashi manga. Iba jagi parnoki gari japi meshi aser driver tem dang colony Council den oa angatettepang ta ashi.
Iba mapang driver tem aser lanur asem tsüngda o atsütepdang truck gari driver kati phone ajanga nisung kar aja aser mapang tatsüka tsüngda nisung pezü gari ana nung arur lanurtem züka merenshi.
Gari nung arurtem jagi lanur asem dak pistol ponglang agi kua merenshi aser parnokisa injang ana kahdokdang lanur ka tetsüng nung tera agi dang mekashi. Parnoki lanur asemji gari telung nung mendaktsür anir aotsü merang saka lanurtemi parnok sülen manidaktsü ta toktep.
Iba osang angashia colony nung taintem aser lanurtem tesem nung adenshi aser parnoki tensaji azüok.
Iba tatalokba atema tejashi nung Kevijau colony nung alirtemi tanü ghonda ishika gari lenmang shibanger lungkak ait. Ajisüaka, District administration aser police-i tiyongtsü nung ia jembiba sülen lenmangji lapok.
March 2016 nung Kevijau Colony Council-i parnok kiyong telongtet nung gari tulutem lenmang tezülen anendena meyudaktsütsü atema telemtetba agi.
Garitem anendena ayuba ajanga school kaketshirtem nem timtem agütsür aser traffic jam adokdaktsür ta asüba onüktem nung ajemdaker council-i iba telemtetba agi aser aibelenertem dang sen 500 senchi achitsü lateta ayu.
Tanü tatalokba dak sendakba nung Kevijau Colony Council-i Dimapur district administration dang anogo tenetnü tsüngda aibelenertem pur ozüng tapet agi merenshitsü atema takhangba agütsüogo.
District ketdangsertemi iba mapa meinyaktetra, council-i junger ta bilemba mapa inyaktsü, ta parnokisa shiogo.
Ano, Addl. Dy Commissioner of Police/PRO, Dimapur, Nagaland-ia sangdong ka nung, nisung pezü jaokba truck driver  ji police-i puogo aser paji asür Harka Bahadur Tamang’er jabaso Mangal Tamang ta jangjaogo.
Bushisüngdang tenzükba sülen nisung pezü rongnung ana- Henivi Chishi’er jabaso Honito Chishi aser Khehoshe Zhimomi’er jabaso Vinoka Zhimomi na pua lir, ta police-isa metetdaktsü.
Tena ket nungi .32 pistol aser Mahindra Bolero gari ka ngutet.
Iba dak sendakba nung Sub Urban Police Station nung ken o ka benokogo aser maneni bushisüngdang südar ta paisa sangdong nung shia lir.