Nübortem kanga saksalema kümdagi

Asenok rongnung anogo shia alima raksaba indang tezüdanga jembir aser shisabolur, ajisüaka asenok asoshi teimla ka lir, ibaji tanem-tanemi nübortemi pei temeten meteta saksalema akümba ya asütsü. Atangji, tang tashi asen lima aser asen government inyakyim nung tashi tulu amshitettertemiang tajangzük agizüka agitetter, iba jagi sensaker aika tesensakba akümer aser takar ishika takarba akümer. Ajisüaka, item tashitemji tizükteta kija aser telok tentet karibo yimten aser lokti nung tim masüba mapatem anema nokdakba angur. Alima majung akümbaji kenüyongi lokti tuluka senden lir melenshitsüba masü saka kenü nisung kati kinük ka nung tim masüba maparen anema ola tilaka adoktsü, ano kenü telok kati ochimashi aser tashiyim amshiba mapa anema ola adoktsü ta alima nung temelenshi arutsüba mopong aon tenzüktsü. Iba ama mapang, kija karbo kanga akoksatsü, kechiyong parnoki ola adokba anema tashi tulu akartemi inyaktsü aser ajemreptsütsü. Ano, yimten nung tim masüba anema ola adoker lokti tentet nung lenirtema kanga timatemtsü aser parnok anema parnok dak nübortemi temulung malem tenzükdaktsütsü asoshi tashi akartemi tiyazü o tapu balala proktsü aser parnok arakzükbaji anendaktsütsü. Iba amaji kija aser lokti kari yimten aser lokti ajungtsü atema nübortem temeten jembia apusoba olaji anendaktsütsü. Ajisüaka, alima nung kecha tashi agia kija aser lokti tentettemi yimten nung tim masüba mapatem anema nokdakba aser pei temeten indang jembiba tanülabo menokdangtettsü aser meremsepdaktsütettsü. Tanü Nagaland tia reprangdangra, iba ama lokti ajungtsü atema inyaker kija aser lokti aika tashi akartemi olulu kija agi mali ama kümdaktsüba ngua aruogo. Ajisüaka, ano kasa tanülaji nübortem dak mesamai kenü kati, kenü kari ta maparen balala nung tim mesüi meshitak inyakba anema ola adokba angashir. Iba olaji nübortem asoshi teimla lir. Atangji, item olajia tashi akartemi akok tashi shibangtsütsü meranger saka shibanger meshibangma anogo shia ola balala adokba angashir. Atangji, mapang talangka nübortem mashilen agi shitaklen kümer jajaba agi, yima sübar, shitaklen meyipa jajanüaka mejajatetba timtem mapang ka tanü ajurudagi. Ibayongji, yangi auer-ashir aser nisung tepseter lir ta kari ayimtenyonga nübortem telok tulubai kecha hau ta mali mangu aser mangashi ama toktsür. Aji oda, kari nübortem akoksatsüsa inyakba ochimashi mapa putetyonga, nübortem rongnung telok tulubai kecha shishia mali, tamajungertemjiang pu asemer ama akümer. Iba jagi asen lima aser lokti jungnüseta majunger. Ajisüaka, iba jagia teimla mesamar. Asenok asoshi anogo tajung yakta arutsü teimla ka lir. Ibaji tashi akartemi aser telok tulubai tai dang tai ta meshitetaka , tanü lanurtem rongnung karibo tai aser tamajung anema kija süaka kanga tasü itta nokdakba angur. Item jagi parnok nokdakba nung mainshitsü aser oda oda parnok denang lokti tuluba anidaktsüsa mapang ka arutsü. Idangjibo asenok ajaki tai dang tai ta shiteta alima yanglushiba nung shilem agitsü. Aji oda, tang nübortem saksalema akümba tamaitsü kaji yimten maparen tapu balala nung inyaksangshiba indang tejangja metetnüa senso aikati RTI ozüng ajanga asüngdang tenzükogo. Iba jagi yimten nung inyakertema akhidang amabo sadema mienyakteter aser miima meyutetter. Iba jagi nübortem ajangzüker. Aji oda, shinga dena tamajung magitep aser azü metokshi ser alima yanglushitsüba lenmang tajungtibaji RTI ajanga government inyakyim tapu balala metetnüa sensosangertemi anidakba ya asütsü. Nübortem asoshi teyari angudak tesem aika lir ser nung masüngdangba agi memetetter, mashir aser miimzüka agir. Ajisüaka, nübortemi pei temeten meteta tasüngdangtsüla purtem dangbo RTI ozüng nung ajemdaker asüngdangpet asüngdanga lira, inyakertema tatidang nung metsüktsütsü aser nübortema teyari tangutsü timbo angutsü. Nisunger yimya nung tebushir aser tanüker melira tai menar, ibaji angateta pei lima yanglushitsü asoshi senso ajaki pei temeten asoshi maneni ola adoktsüla. Kong ola tuluba adokdir, ilenji tama aser tajungba küma yanglushir alitsü.