Russia asayartem nokdangbaren aitsür: Putin

Moscow, July 27 (Agencies): International Association of Athletics Federation (IAAF) densema, alima jenjang nung tentetba saisapongtsüren ketdang asür tentettemi Russia’er asayartem Rio Olympics nung shilem magidaktsütsü nokdangba maparen aitsüba olen ka Russia Tir, Vladimir Putin-i tanü, Bodbar nü metetdaktsüogo.
“Tanüngba alima asayartem den tajungba shilem agir, Russia asayartem nem Olympics nung shilem magidaktsüba ajanga Olympics asayamong jenjang tamajungba kümdaktsütsü,” ta Putin-i Rio Olympics nung shilem agitsü asoshi Brazil kübok Rio de Janeiro bushia aor Russia asayar aser ozüng alema mozü mora achiba ken o nung ajemdaker Olympics nung shilem magidaktsütsü tenokdangba ngua alir Russia asayartem den tanü Moscow kübok Kremlin nung ajurutepdang ashi.
Asayar 387 tashi densemba Russia Olympic team nungi asayar 100 dak tema anema ozüng alema mozü mora achiba ken o nung ajemdaker Olympics nung toktepa shilem magidaktsütsü tenokdangba benoka lir.
“Alima dang Russia’er saisapong jenjang mejungi sayutsü nükjidong nung aibelena maliba Russia asayartem anema tan tenokdangbaren benokogo. Iba ama bendanga amshiba maparen kanga sashia aitsür,” ta Putin-i metetdaktsü.