6 buba ENSF Fiesta Sports tenzükogo

Dimapur, July 27 (TYO): 6 buba Eastern Naga Students Federation (ENSF) Fiesta Sports saisapongtsü sentong yashi, Mongolbar nü nungi tenzüka Mon district kübok Local Ground nung asayatsü tenzükogo.
‘Battle for Peace’ omen nung ajemdaker ayongba asayamong tetenzükba sentong nung Nagaland Parliamentary Secretary, Municipal Affairs Economics & Statistic, R. Tohanba tongti tesemdanger, MLA Pangnyu Phom tetushi tesemdanger aser taoba ENSF Tir, Y.P. Chillio pela jaokba tesemdanger liasü.
“Tan ENSF Fiesta agidang kibok mangatettepbaren ajunga benteta agientsü asoshi ENSF ayongzüker. Nisung ka shisatsü aser temang renloktsü maparen nung saisapongtsü ya tongti shilem ka lir anungji, asayar shiai tetoktepba balala nung shilem agidang külem asayartem temeten anema masayatsü ajungshir,” ta tongti tesemdangeri metetdaktsü.
Tetushi tesemdanger, Pangnyu-ia nübur rong nung telungjem alitsü aser Nagaland anüdoklen alir nüburtem rong nung yimji yimjung alitsü asoshi nungdakba maparen inyaktsü asoshi ENSF ajungshia liasü.
“Yimji yimjung maliba ajanga Nagaland anüdoklen alir nüburtem rong nung telungjem malitsü aser lanurtem indang kaketshisatsü bushitsü jenjanga tamajungba akümtsü,” ta shia, Chillio-ia ENSF kübok züngsemba telok ajunga lungjema alitsü tayongzükba olen ka metetdaktsü.