Tzümetsüng khuret atema Assam Assembly anogo 3 anena atar

Guwahati/Itanagar, July 27 (Agencies): Bodbarnü Assam Assembly nung kodanga meinyakdangba mapa ka inyakogo, aser ibaji MLA temi pei constituency semdanga tzümetsüng timtem osang metetpelatsü atema anogo asemnü Assembly magii sodi agitsü telemtetba agiba lir.
Tanep Assembly tenzükli ruling aser opposition MLA temi tzümetsüng timtem indang onük benoka olemtep aser parnoki Speaker dang parnok pei pei constituency semdangi aotsü atema assembly anena atatsü mepishia liasü.
Chief Minister, Sarbananda Sonowal-ia iba onük pusema nungitba sülen Speaker Ranjeet Kumar Dass-i minute 30 atema senden anena yur Business Advisory Committee (BAC) rongdak senden ka jatepa amen.
“Tzümetsung khuret ya ulura aser kanga süoki ia agitsüla. MLA ajak teyari agia BAC-i July 30 tashi House anena atatsü telemtetba agir,” ta senden amenba sülen Speaker-i metetdaktsü.
BAC-i Budget Session ji anogo ka talila atsülanger aser ibaji August 13 tashi agitsü, ta Speaker-isa shisem.
Assam nung tzümetsüng timtem tuluba kümogo aser nisung asem tashi asüba züngsem tasür ajak agi 13 jungogo.
Brihostibarnü Chief minister Sonowal-ia par constituency Majuli semdangtsü aser tzümetsüng agi iba tesem tamajungtiba kongshia lir.
Tanü Sonowal-i tasür kibong shia nem sen lakh 4 teyari agütsütsü, ta metetdaktsüogo aser senotsü o relief osettsütet peria dang lir ta shisem.
Ano külen, Arunachal Pradesh Chief Minister Pema Khandu-ia Itanagar nung rongdak senden ka ayongzüka tzümetsüng khuret lemsatepogo.
Arunachal kübok district pezü nung tzümetsüng timtem ajurua lir aser Pema Khandu-i department ajak dang amalitepa iba khuret koktettsü atema mapa inyaktsü tetuyuba agütsü.