Rengma nungeri Tseminyu district tentettsü takhangba agütsür

July 27, 2016 nü Tseminyu nung Rengma Hoho-i ayongzüka Rengma nunger atema Tseminyu district tentettsü asoshi takhangba agüja public rally aliba noksa angur.

Tseminyu, July 27 (TYO): Rengma Hoho-i anir Rengma Naga nunger aikati tanü Tseminyu jila nung sentong ka ayongzüka Nagaland sorkar dang parnok asoshi district balaka agüjang, ta takhangba agütsüogo.
Tanü tsüngsang mejungaka Rengma Hoho kübok Rengma Naga nunger meyirjang aika adenshia iba sentong nung aden aser parnoki tezülubatem amer shilem agi.
“January 16, 1929 indang Simon Commission nung Rengma nunger dena lir,” “1991-2016 tashi küm 25 sub-division ama timtema arur”, “district balaka akümtsü atema Tseminyu sub-division jenjang tongogo”, “1866 Naga Hills district mapang nungi Rengma nunger ya Naga nunger kin ka lir” ta tanü Rengma nungertemi tezüluba balala amer sorkar nem takhangba agütsü.
Tseminyu Additional Deputy Commissioner Headquarter nungi district headquarter balaka ajungketang ta takhangba pusema jembidang Rengma Hoho Tir, Kenyuseng Tep-i, “Nagaland State ya nütsüng yongsük aser litsü nung ajemdaker masü saka yimten tsütsü kin nüngdakba ajiteta tentetba lir,” ta ashi.
“Nagaland kübok district 11 prongla nütsüng yongsük aser litsü mesüra MLA menden nung ajemdaker masü saka nüngdakba ajiteta tentetba dang lir,” ta paisa shisem.
Tanü public rally agiba sülen ADC Tseminyu ajanga Rengma Hoho-i Chief Minister, T R Zeliang nem tezüluba ka nung takhangbatem agütsü.
1866 küm Naga Hills district ya Samuguting (tang Dimapur district kübok Chumukedima) headquarter sür tentet, aser iba district tentetang Rengma nunger kanga tongtipang liasü kechiyong Naga Hills district litsü tulubalen Rengma nunger lushi liasü, ta Rengma Hoho-i züluba nung shia lir.
“Naga Hills nung administrative headquarter pungubaji Tseminyu lir saka tang tashi iba tesem ya Sub-division ka dang lir. Tseminyu sub-division ya küm 69 tain lir, anungji district jenjang nung ajungkettsü temsüa aliba sub-division ji iba ya lir” ta shid nungsa shia lir.
Nagaland kübok Longleng sub-division nung nütsüng yongsük 50,854 (2011 census) liasü aser yimten nüngdakba ajiteta district jenjang nung ajungket, süra nütsüng yongsük 56,844 (2011 census) aliba Tseminyu district ka akümtsüba tim dang lir, ta paisa shisem.
Tanü sentong nung PWD (Housing) Parliamentary Secretary, Levi Rengma-ia o jembidang, Rengma nungeri Naga nunger atema shilem tajung agiogo anungji sorkari onok takhangba agizüktsüla aser tanüngba Naga nunger adianutemia pusema nungittsüla, ta ashi.
“Rengma nungertem küm aika akoksa aruogo anungji asenok tangatetba melenshidi aser ka küma longjemdi” ta Levi Rengma-isa tesentepertem ayongzük.
“Ni Rengma nunger atema inyaker aser ozü nübortem atema kechi shitaka ta südir inyaktsü. Sorkar nungi agientsü asünunga ni shisabulua mebilemer” ta paisa metetdaktsü.
ADC Tseminyu, Vikhweno Meratsu-i Rengma Hoho-i memorandum agütsüba agizük aser lai iba ya sorkar dang abentsü ta nangzük.
Sentong nung taoba mapang Constituency MLA ana- R. Khing o Nillo Rengma aser BJP National Vice President ST Morcha Johnny Rengma nungeria o jembi.
Sentong nung mendenji Rengma Selo Zi president Kennth Kath liasü, Haiwalo Apon-i sentong tenzüka sarasadem aser Rengma nunger ordained minister aser pastor temi parnok takhangba nung Tsüngrem temoatsü meshia sarasadem.