Tamakok anguba satan

Yisu Khrista asenok menen asoshi asü aser shia aruba takokji satan madak takok anguba mapa lir, anungji Satan anema raratsübaji asenok mapa masü. Ajisüaka, asenok Khristan purtem aikati Khristan ka mapaji Satan anema raratsüba mapa amato dang bilemer. Iba tamang jenjang nungi asenok aientsüba mapangji tang lir. Yisu Khristai Satan madak takok nguadokogo, anungji Satan den raraba mapa nung asenok mapang aser tashi endoktsü menüngdaker. Asenoki Yisui Satan madak takok anguba mapa dakji amangtsüla aser Satan den raraba nung mapang aser tashi meindoktsüsa parnokji asenok anasai marudaktsütsüla. Ibayongji, Laishiba nung Kolosi tapu 2:15 nung yamai ashir, “-tanüla yimsüsübatem aser item ain tashitem pai agizüka endoktsüogo, item madak takok ngua pai parnok yimjak nung jungkai adoka sayuogo”. Ano, temenen moijing ya kanga tekülak aser tiyazü tebu ta Yohan 8:44 nung shia asenoki angur. Iba jagi, temeneni asenok dang teti Yisu Khrista sür shia aruba indang atidaka bilemdaktsütsüa akok mesüra mamangdaktsütsüa akok. Iba jagi asenok tanem-tanemi Tsüngrem nungi atsüngzüka aor. Aji oda, asenoki Yisu Khristai temenen madak takok mangu ta bilemra, asenoki Yisu Khrista takok anguba takok nung melidang aser mengudang asütsü. Iba jagi Satan anema raraba tongpangbo kokadoker ser nung nabo anogo shia kasa tongpang nung nokdaker ama nai bilemtsü. Yisu Khristai Satanji maksüdakja kokadoker ser nung, naibo Sataniang Yisu Khrista madak takok angu ama bilema teti tsübua bilemtsü. Ajisüaka, Yakob tapu 4:7 nungbo Satanji asenok nungi ajentsü ta shia angutsü. Aji oda, asenok Tsüngrem den lira, asenok nungi Satan jena aotsüsa Yisu Khristai satan kokja-kokadoker ser nung, asenokiang Satan tsübua bilemra, asenok Tsüngrem yimli nung alirtem masü ta angatetdi. Atangji, Satani asenok anema inyaktsü tasa aika atongtsüa akok, saka asenoki itemji nokdangtettsüla aser asenok anasaia marudaktsütsüla. Iba jagi dang Yisu Khristai Satan madak takok angubaji asenok taküm ajanga jangjadaktsütsü. Aji oda, tamajungba anogotem nung moijing anema nokdaktettsü asoshi temeshiba sobutsü tapu balala sübotsü asoshi Efesia 6 :10-20 nung shia aliba sübotsütem sübotsü asenok asoshi kanga tenüngdaktsü. Item sübotsü mesübuba agi asenoki mojing tsübur aser moijing den rarar aser parnoki akoker.  Aji oda, anogo shia asenok Satan den raraba tongpang nung nokdaktsüsa kümra, asenok nem nungloktsüba osang tajung abentsüba mapa inyaktsü mapang mangutsü. Iba ama takümji Tsüngrem tsüngdang tejang matangba süngdong mesüka lir. Asenok Khristan purtemi Satan tsübua bilembaji teti atema tepuokdak yutsüba purtem tsübua bilemba amato lir, mesüra kiburi alar tsübuba amato lir. Iba tamang jenjangji asenoki tongtettsüla. Asen melen Tsüngrem chiri koker yutsüba tongpang nung ano ken asenok mapang aser tashi endoktsü menüngdaker ta asenoki angatetdi. Asenok mapajibo mojing den raraba nung mapang endoktsüba masü saka tangar dangi osang tajung bener aotsübaji asenok mapa lir. Kodang asenoki osang tajung metsü proka jajar, idangji dang satan tamakok aser Yisu takokba indang tali jangjar. Iba tamakok aser takok indang tali jangjatsü asoshi Luke 10: 17-20 tashi nung shia aliba tashi aser teinyaktsü  indang tali tajungba angatettsü merangdi. Nü mapaji Satan den raratsüba masü saka osangtajung sangdongtsüba mapa aser nü mapaji satani nai ashiba angaba agi pelatsüba masü saka nü tenüng taküm kaket nung züluoka aliba asoshi dang pelabatsübaji kanga tongtibang lir. Asenoka Satan den raraba nung mapang endoker asü mesüra osangtajung prokba aser Yisu Khrista asen menen asoshi sür Shia aruba tashi, takok aser ochi indang kuli süba nung mapang endoker. Aji bilemdangdi aser amang marudang, sangwa alidang asenok nem nungloktsüba mapa shitak inyakdi.