Suu Kyi-i tzümetsüng lendong ajurushirtem semdangogo

Tan tzümetsüng lendong atalokba sülen pei talikdak toktsür jenokdak balala nung jenoka alirtem den ajuruteptsü asoshi Myanmar opposition lenila, Aung San Suu Kyi (Tiyongtsü)-i rong ka nung mener Yangon yimti nungi northeast tsütsüleni kilometer 80 shi pilar Bago nung tentetba monastry bushia aoba noksa nung angur. (Yangon, August 03)

 Yangon, August 03 (Agencies): Myanmar opposition lenila, Aung San Suu Kyi-i tang tzümetsüng lendong atalokba tesemtem semdanga lendong ajurushia alirtem den tanü Hombar nü ajurutepogo.

Myanmar Tir, Thein Sein-ia Myanmar anüdoklen tsütsü Sagaing region taoba hopta semdangba osang jangjaogo.

Tzümetsüng lendong kanga sashia atalokba sülen emergency tesem ta züngokba tesem pezü rong nung Saging region-jia densema lir.

Ajisüaka, tzümetsüng lendong ajururtemi ajurushiba timtem toushi tia agientsü asoshi mapang shitak nung nungdakba maparen meinyakba atema nüburtemi osangkaket aser social media ajanga Tir Sein kanga sashia aitsüogo.

“Tan tzümetsüng lendong atalokba ajanga alu jenti raksatsüogo. Tang tzümetsüng lendong ajurushirtem den ni tanü ajurutepa parnok taküm jenjang tajungba kümdaktsütsü aser parnoki takoksa ajuruba menoktsütsü lenmang bushitsü onük benoka jembiogo,” ta Suu Kyi-i osangbener den ajurutepdang metetdaktsü.

Laisa ashiba agi, tzü metsüngbaren tajemba akümtsü tenzükogo aser Myanmar sorkari tan lendong ajurushirtem taküm tia tajungba kümdaktsütsü maparen tenzüka lir.

“Myanmar anüdoklentip aser anülulentip tsütsü alir Myanmar nübur 200,000 shi tang timtem toushi jenti ajuruba osang jangjaogo,” ta Myanmar Relief & Resettlement ministry-ia tanü metetdaktsüogo.

Mitkartema relief ketdangsertem den külemi lunjemer nungdakba teyari agütsüba den külemi, lendong ajurushia alir taküm kümzüka anitetba osanga jangjaogo.

Hopta ishika tzünglu kanga sashia aruba den külemi, toaba hopta cyclone yipru lendong atalokba ajanga Myanmar nung alirtemi tzümetsüng aser anentsü lendong kanga sashia ajurutsü tenzüka lir.

Myanmar nung kin o kin na tsüngda mangatettep adoka raraba ajanga pei talikdak toktsür Sittwe jenokdak jenoka alir nisung 100,000 densema Myanmar southwest tsütsü, Rakhine state tzüyimkümlen alirtemi tebang agi meshitetba timtem ajurua aliba osang bushiteta lir ta United Nations (UN)’er humanitarian agency-ia tanü metetdaktsü.