Revival arur küm 40 ajungba tenüngsang agütsüba mung amung

Dimapur, July 30 (TYO) :  July 24, 2016 nü Changtongya Town Baptist Arogo nung Revival arur küm 40 ajungba tenüngsang agütsüba mung THE FIRE OF REVIVAL NAGALAND-i ayongzüka kanga dang takok aser temoatsü tulu ngua amungba sangdong ka ajanga metetdaktsüogo.
1976 nung Changtongya Town (CTN) nung amatsü makokba tatalokbatem liasu. 1976 July 19-25 tashi Revival aliba mapang, aiür asangur 60 mangdangi ao. Iba ya mezüng mangdang tenzükba liasu. Ibaji tesüngmangtsü sayatenya ka liasü. Mangdangi aoertem pei kinunger jaka balala nungi aruagi temenen menangzük tashi shia maru. Nisungtemi tesangwa angu aser kotak tenyar alua angu. Yisu tashi tait teka adoka sayu. July 26, Hombar anepdang kodang student-tem schooli ao, Changtongya Town High School nung parnok anepdang sarasadem agiba manenteti nikongdang 5 PM tashi liasu. Ibaji ngua hindu nunger master kaa temulung meyip. Tang reprangdangra küm 40 tashi renteta arudang CTN nungi adokba nübortem, Tsüngrem tenzükertem aser missionary-tem alima balala nung Revival  temoatsü sungjang chidagi.
Iba sendong nung Rev M.I Luen-i CTN nung atalokbatem aser 1976 Revival nung sayatenya atalokbatem bilemteta, ano nisung shia pei taküm nung Yisu chichia akatsüla ta ayongzük. Chuba Pastor Wamaken-i asen Tsüngrem nem kechisarina ajak nung tenüngsang agütsüdi ta tajungshiba tulu den tenüngsang agütsüba sarasadem ayongzük.  Mr. Chubakümzuk Tuli, shiba 1976 Anaki nung mezüng Revival milak, Tanela temeshi-i semdangba mapang alirtem parnok nisung 14 rongnung tanubosang liasü, pai-a tenüngsang aser tayongzükba agütsü.
Iba anogo nung Tuli nungi nüngtugu kentener TSÜKDOKSHIR teloki ken tajung agi telok ayongzük. Rev. Yanger Pastor Changtongya Town Baptist Arogo-i Rev. M.I.Luen-i Ao oshi nung ‘1976 NAGALAND REVIVAL OTSÜ’  züluba kaket sayaa (release) liasü.  Iba kaket Mokokchung nung ‘ABAM  Book Depot’ nung, Dimapur nung OM Book store aser Christian Literature Centre nung, aser Kohima nung Christian book outlet nung angutsü.