1st Inter School Ao spelling bee tetoktepba nung Kr. Rishiben Walling-i tematiba angu

ABAM executive Secy. Rev. Dr. Mar Atsongchanger ajanga 1st Inter School Ao Spelling Bee tetoktepba nung takokertem nem senpet lemshia agütsür külen, tedendangertem aser tayongertem den külemi agiba noksa ka yangi angur. Mokokchung, July 30, 2016

Mokokchung, July 30 (TYO): July 29 & 30 anogotem nung Jenjeter Kohima aser Department of Linguistics, Nagaland University Kohima nati külem ser ayongba Mokokchung district kübok mezüngbuba Inter school Ao Spelling Bee tetoktepba sentong ka yangi Mokokchung Cosmos Hall nung takok ngua agiogo.
Taküm iba tetoktepba nung tematiba jenjangji Jubilee Memorial School (JMS) nungi Class 9 nung azünger Kr. Rishiben Wallingi angu. La den atongla tanabuba jenjang nung Queen Mary Hr. Sec School nungi class 12 nung azünger Kr. Imtiwala liasü.
Tasembuba jenjang nung Edith Douglas HSS nungi Kr. Lanusenla T Jamir (Class 9), pezübuba jenjang nung Clark MHSS Impur nungi Sp. Imlikümzük (Class 11) aser pungububa jenjang nung Senayangba GHSS nungi Kr. Tekamongla Lkr (Class 12) liasü.
Takoker ajak nem tayongeri sen den kuli kaket tajung kaka agütsüogo. Iba den Champion nem Lenjeter Magazine ajanga August ita nungi tenzüka ita trok (W.e.f Aug 2016 – Jan 2017) scholarship agütsütsü, ta metetdaktsüogo.
Osang tajung kaji; tang shima alir finalist pungu (5) yagi Mokokchung tenüng nung ‘All Nagaland Ao Spelling Bee Championship’ koba taküm küm tatemlen ayongzüktsüba lir, yangji shilem agitsü, ta tayongertemisa metetdaktsü. Iba kasa tetoktepba ya Kohima aser Dimapur nunga yakta agitsü, ta parnokisa shisem.
Taküm iba Ao zülumen (spelling bee) tetoktepba sentong nung Mokokchung town aser temeküt nungi school 13 nungi parnok 35-i shilem agia liasü aser iba tetoktepba ya class 8-12 tsüngda pur atema dang liasü.
Tanü senpet agütsüba sentong nung Ao Baptist Arogo Mungdang, executive secretary, Rev. Dr. Mar Atsongchanger densema pai mapang tatsüka agia tajungshi o jembidang, iba sentong ajanga Ao oshi rendaktsüba den zülumen liromedemba nung mera tasen agiba asoshi tayonger dang pelaba metetdaktsü.
Tetsü oshi wazüka ayutsü ajungshia ashidang, “Asenoki pei oshi amadokra asenok tesama tiai aitsü”, ta pai laishiba nungi otsü kar atishia oshi tongtibang indang kar lemsatep.
“Ibai Ao kin asoshi mera tasen ka lir aser ibai ajanga Aor dang masü saka Naga nunger asoshia tatishitsü asütsü”, ta paisa shisem. Pa ket nungi takoker ajak nem senpet lemshia agütsü.
Iba den ano mapa tajung kaji; Lenjeter Magazine ajanga school aser college-tem nung Ao oshi azüngtsü ajungshia 2016-2017 kümsük asoshi Class 10 nungi kaketshir asem aser college level nungi ana nem scholarship agütsütsü. Class 10 nung; Sp. Takotemshi (Mayangnokcha GHSS) aser Kr. Purtola Walling (Govt. HS Mokokchung Village) na den tanga kin nungi Sp. Naiwang (GHS Changtongya ‘B’). College level B.A 3rd aser 4th semester Fazl. Ali College nungi Kr. Benjonglemla aser Kr. Sakurepla na shimogo.