Tzü metsüngba kuliji asenoki bushitsüla: Rajnath

New Delhi/Guwahati, July 30 (Agencies): Honibarnü Home Minister, Rajnath Singh-i tayimtsü nungi Assam nung tzümetsüng agi kongshiba districts- Nagaon aser Morigaon den Kaziranga National Park repranga senzüba sülen pai state sorkar dang Centre-i akokba tashi agi yaritsü, ta shiogo.
Assam nung tzümetsüng agi kongshiba tesemtem asadangba sülen osangbenertem den jembidang Rajnath-i, tzümetsüng ajanga takoksa angur kibongtem nem sen lakh pezü agütsütsü, ta sangdong.
Tanü Rajnath den DoNER Minister, Jitendra Singh, Assam Chief Minister, Sarbananda Sonowal, Assam Finance Minister, Himanta Biswa Sarma aser tongti ketdangsertem liasü.
Singh-isa Morigaon nung Relief Camp ka semdanga yangji jenoka alirtem ajurua jembi.
“Tensa asadangtsü atema ni Morigaon, Nagaon aser Kaziranga National Park semdangogo. Iba tensa ya kanga majung ta ni bilemer. Ni Assam Chief Minister, Sarbananda Sonowal dang tzümetsüng agi kongshia alirtem tajungtiba nung yariang ta shiogo aser Centre sorkaria state sorkar den yariteptsü,” ta pai Lokapriya Gopinath Bordoloi International (LGBI) Airport nung osangbenertem dang ashi.
State nung tzümetsüng agi nisung lakh 36 shi kongshiogo.
“Tzümetsüng ajanga hopta ka tsüngda nisung 26 süogo,” ta Rajnath-i ashi.
Assam tzümetsüng ji linük tebilemtsü onük ka ta sangdongtsü asü (?) ta asüngdangba langzüdang pai, “Tzümetsüngji linük tebilemtsü ka, ta sangdongba ajanga tebilemtsü makoktsü. Tzü metsüngba kuliji asenoki bushitsüla aser iba tebilemtsü ajema akumtsü atema lenmang bushitsüla,” ta ashi.
Tzümetsüng tebilemtsü atema Assam nem senotsü agütsütsü asü ta asüngdangba langzüdang Rajnath-i, State Disaster Rescue Force (SDRF) kübok state sorkar sen crore 620 lir aser nüngdak apir nüngdakra ano tali agütsüsemtsü, ta ashi.
“Iba senji amshiang, Centre-i senotsü tali agütsütsü,” ta pai ashi.
“Chief Minister-i kü nem temepishiba shidi ka agütsüogo aser ni New Delhi atongba sülen takhangba ajungaji onoki shisadangtsü,” ta paisa shisem.