Odisha nung pias wazüka ayutsü atema ‘Cold Storage’ kar lapoktsü

Bhubaneswar, August 3 (Agencies): Odisha sorkari pias jenjang ajema kümdaktsüba nung yaritsü atema pias wazüka aser kümzüka ayutsü atema cold storage 300 lapoktsü, ta Hombar nü Agriculture Minister Pradeep Maharathy-i metetdaktsüogo.

State tesem ajak nung iba storage tem ajanga piyas tonne lakh 25 tashi meraksai kümzüka yutettsü, ta pai ashi.

Iba maparen nung shilem agia acha ayangner nem noklang nung shilem 50 subsidy agütsütsü. Iba sülen aluyimertem nem iba nungjagi pias metsüh agütsütsü, ta paisa ashi.

Tang Odisha nung shishilemba dak pias seret ka nung sen 45 tongogo. Sorkari shishilembartem dang seret nung sen 4 dak tali tajangzük magitsü metetdaktsüogo.

Odisha nung küm shia pias tonne lakh 3.95 adoker aser nüburtemi tonne lakh 2.97 achir.

Pias adokba dang nungi achiba tajemba süaka state nung pias meraksai rizünga ayutsü tesem maliba ajanga raksaa intokba timba akümer.

“Cold Storage maliba ajanga aluyimertemi state nung adokba pias ya Chhattisgarh aser Andhra Pradesh state tem dang ayoker,” ta minister Maharathy-i ashi.