Somalia bomb lendong nung 13 pokset; 10 shi yiru

Somalia yimtiba, Mogadishu kübok Criminal Investigation Department (CID) tesepti nung bomb lendong 2 tashi atalokdaktsüba sülen Somalia mitkartemi lendong atalokdak bushisüngdangba noksa nung angur. (Mogadishu, August 01)

Mogadishu, August 01 (Agencies): Somalia yimtiba, Mogadishu nung tentetba Somalia police tesepti nung bomb lendong tesashi 2 tashi yashi, Deobar nü atalokdaktsüba osang ka Somalia internal security minister, Abdirizak Omar Mohamed-i tanü, Hombar nü metetdaktsüogo.
“Yashi lendong nung lendong atalokdaktsür nisung 7 densema, ajak agi nisung 13 tashi poksetba aser tajemba agi nisung 10 yiruba osang jangjaogo,” ta pai ashi.
“Peisasa pokseta asütsü mulungteter nisung anati gari kaka anir Criminal Investigation Department (CID) tesepti telungi tashiyim agi aitsü merang. Mezüngbuba gari anisangi pokshiba oset alenokba gari-ji CID tesepti kimalen pokdaktsü aser tanabuba bomb-ji CID tesepti atongba jakdang lenmang tiyongtsü nung pokdakja lendong atalokdaktsü,” ta pai osang jangjashitsü.
Paisa ashiba agi, pokshiba lendong 2-ji atalokba sülen tongpang nung amshitsü prangpong abener nisung 5-i CID tesepti telungi ai saka police ketdangsertemi par 5 prongla kasetadok.
“Tan lendong nung asür nisung 13 rong nung amaker 7, sorkar mitkar 1 aser nübur 5 tashi densmba osang bushitetogo,” ta Somalia internal ministry otongdar, Abdikamil Mo’alin Shukri-ia metetdaktsü.
Ano külen, tan lendongji par teloki atalokdaktsü ta shia, Al-Shabab telungpur teloki tan lendong atalokdaktsüba atema tenüng agia metetdaktsüogo.