Dahal-i Nepal PM menden atema tenüng züluoker

Kathmandu, August 02 (Agencies): Communist Party of Nepal (Maoist Centre) yimtenren telok nung mendenbuba, Pushpa Kamal Dahal-i Nepal Ato Kilonser menden atema candidate ka ama tokteptsü nükjidong nung pa tenüng tanü, Mongolbar nü züluokogo.
Maoist Centre telok pusemer yimtenren telok, Nepali Congress Tir, Sher Bahadur Deuba aser Maoist lenir, Krishna Bahadur Mahara nati Dahal tenüng züluokba maparen pusemba osanga jangjaogo.
Asüng, Bodbar nü agitsü ayongba Nepal Ato Kilonser shimtsü election nung Dahal pusemtsü renemba osang ka Sanghiya Loktantrik Madheshi Morcha telok densema, Nepal nung tentetba tongti yimtenren teloktemia metetdaktsüogo.
“Nepali Congress aser Maoist Centre telok na tsüngda onük 3 densemba tezüngzüktep agiba sülen teloktep yimtenren teloktemi Dahal pusema nungitsü lemtet,” ta Sadhawana telok lenisang, Karna-ia ashi.
Dahal pusemtsü renemba teloktep yimtenren telok nung yimsüsür 39 tashi densemba yong Dahal-i election nung takok ngua, Nepal Ato Kilonser tasenba akümtsüsa jenjang tajung ngua lir.
Dahal-i Nepal Parliament yimsüsür 595 rong nungi vote 298 tashi anguba ajanga election nung takok angutsü lir.
Par Maoist telok nungi yimsüsür 82 aser par telok pusemer, Nepali Congress yimsüsür 207 tashi aliba yong tanü tashi nung Dahal-i vote 289 tashi angutsüsa tang jenjang tajung ngua lir.