Libya: US mitkartemi IS anema raratsü tenzüker

Pentagon, August 02 (Agencies): United States mitkartemi par tayimtsü amshia Libya nung tesep tentetba Islamic State (IS) kiralongrar telok anema yashi, Hombar nü nungi tenzüka raraba osang ka Pentagon-i tanü, Mongolbar nü sangoktsüogo.
United Nations (UN)-i nungitba Libyan Government of National Accord (GNA)-i IS telok amaktsü asoshi benokba onük agizüka, US mitkartemi Sirte nung tesep tentetba IS telok yashi amak ta US aser Libya sorkar ketdangsertemi osang jangjashitsü.
“US Secretary of State, Ash Carter aser US Chairman of the Joint Chiefs of Staff, General Joe Dunford nati ajungshiba sülen US Tir, Barack Obama-i GNA sorkar den yariteptsü nükjidong nung IS telok amaktsü ozüngji agütsü,” ta Pentagon Press Secretary, Peter Cook-ia metetdaktsü.
“Ozü mitkar tayitmsütemi GNA pusemba mitkartem aser anasa alir nüburtem anema raratsü asoshi IS teloki amshiba tank tongpang gari 1 aser tanga gari 2 tashi poksatsüba osang jangjaogo,” ta pai ashi.
Paisa ashiba agi, Libya nung tentetba IS telok meshi meshia mesamatsü tashi par mitkartemi GNA mitkartem den yariteptsü renema lir.
IS teloki küm 1 tejaklen nungi tenzüka, Sirte nung par tesep tentetba osang ka US’er Africa Command nung Deputy for Military Operations, Vice Admiral Michael Franken-ia metetdaktsüogo.
GNA mitkartemi takok ngua tongpang raraba ajanga tanübo Sirte nung tesep tenteta alir IS züngsem 1,000 shi dang anünga aliba olen ka Cook-isa metetdaktsüogo.
Tan IS telok amakba ya yaküm, 2015 küm November ita nungi tenzüka tanü tashi nung US mitkartemi par tayimtsü amshia, Libya nung tesep tenteter IS telok anema amakba maparen tasembuba inyaker lir.
Taküm February nunga US mitkartemi par tayimtsü amshia Libya anülulentip tsütsülen tentetba IS training camp ka amakba osang jangjaogo.